Pynshai ka JHADC ha kaba ïadei bad ka jingthung Agent ha ki Forest Revenue Station

Jowai, Naitung 16: Mynta ka sngi na ka liang ka JHADC kala pynshai halor ka jingthung ïa ki Agent ban peit ïa ki Forest Revenue Stations jong ka bad pynshai ruh ba ka Council kam shym la thung ïa kino kino ban long ki Agent ha ki Weight-bridge cum Forest Check Point, namar ba ym don kum kita ki Weight-bridge kiba pynïaid da ka Council.
Ïa kane ka jingpynshai paidbah ka Council kala leh hadien ba kila mih ki khubor ba ka HITO kala ujor ejahar pyrshah ïa u ma Sevenborn Tang ha u Superintendent of Police, East Jaiñtia Hills District da kaba kynnoh ba u dei u nongpynïaid jong ka Forest Check points ka JHADC.
Ka JHADC haka kyrwoh ba la phah sha ki lad pathai khubor kala pynpaw ba dang shen ka HITO kala pan RTI halor ka jingthung ïa ki Agent ban pynïaid ïa ka Weight-bridge cum Forest Check point kaba don ha Sunapur, East Jaiñtia Hills District. Haba jubab ïa kane ka jingkylli na ka liang ka JHADC kala kdew ba kam shym la pynïaid ïa kino kino ki weight bridge hapoh u pud treikam jong ka. La kdew ba ka Council ka don ïa ki Forest Revenue Station, hynrei kim dei kita ki Weight bridge cum forest check point, kumta ym don Agent ba pynïaid ïa ki.
La pynpaw ba ka JHADC kala don ïa ki Forest Revenue Station kiba la buh katkum ka Rule 56 jong ka United Khasi & Jaiñtia Hills Autonomous District (Management and control of Forest) Rules, 1960 bad ïa kine la pynïaid hi da ka Council. Hynrei na ka daw jong ka jingduna palat ka jingpynmih pisa na kitei ki Station ka bym lah ban pyndap ïa ka jingsiew tulop ïa ki nongtrei ruh. Kumta ka Council kala sngewdei ban ban aiti ha ki riew shimet ban pynïaid ïa kitei ki Forest Revenue Station na ka bynta ban pynïoh nong ïa ka Council.
Ha kaba ïadei bad kane ka Council lyngba ka bor bala pynkup ha ka katkum ka Under Section 12 of the United Khasi & Jaiñtia Hills Autonomous District (Management and control of Forest) Act, 1958, the management and control of all forest check stations (Revenue Stations), kala khot Tender ïa kane ka kam, ha kaba u ma Sevenborn Tang ula ïoh ban pynïaid ïa kine ki Forest Revenue Station ka Council na ka bynta 3 snem.
La pynshai shuh shuh ba utei u Sevenborn Tang ula shimkhia ïa la ka jong ka kamram bad u la lah ruh ban pynpoi pisa man la ka Quarter sha ka Council bad haba nujor ïa ka jingpoi ka pisa ka long kaba myntoi shibun haba nujor ïa ki snem kiba la dep.
Kumta ka JHADC kala pynpaw ba baroh ki jingkynnoh jong ka HITO ki long ki bym don nongrim, ki bym shisha bad kiba ïalam bakla ïa ki paidbah. La kynthoh ba ka HITO kala leh ïa kane ka kam khlem da jurip bniah ïa ki jingshisha baroh.
Khadduh ka JHADC ka pynshai biang ba u ma Sevenborn Tang u dei u Agent ba la thung da ka JHADC ban peit bad pynïaid ïa baroh ki Forest Revenue Station jong ka Council.