Shillong, ïaïong: Ka Executive Committee jong ka Dorbar Shnong Umsyiem ka ba la shong kyrkieh ha ka 12 tarik mynta u bnai ka la pyrkhat sngewkhia bha ha ka ba ïadei bad ka jingmih khubor ha ki katto katne tylli ki kotkhubor halor ka jingshah kem jong uwei u briew u ba kit 3000 tylli ki KuliYaba, kata ha ka ba la ong ba ki Shipai BSF bad ryngkat ki pulit ANTF ki la ïoh kem najan ka Shnong Rimassar ïa U Bah Prakash Sumer 42 snem ka rta uba dei na ka shnong Umsyiem ha ka ba ki la ïoh kurup ruh napoh kali jong u ïa 3000 tylli ki kuliYaba ki ba dei ki jingdih ba pynbuaid.
Na ka liang ka Dorbar ka la ong ba katei ka jingmih khubor ka la pynkyndit bad pynsngewsih shibun eh ïa ki paid nongshong shnong baroh kawei namar katei ka jingleh jong utei u rangbah Prakash Sumer ïa katei ka kam beai ka ba la pynthoh bria bad pynjah burom ïa ka kyrteng jong ka shnong.
Kumta na ka liang ka Committee ka ba la pyrkhat sani halor kane ka kam ka pynshai paidbah da ka ba ong ba u Bah Praksah Sumer u dei ba la kha la pun hapoh shnong Umsyiem. Hynrei, mynta la palat 25 snem tam eiei um shym la shong la sah shuh hapoh shnong namar u la poikha sha kawei pat ka shnong.
La ong ruh ba na ka liang ka shnong kam don jingtip eiei ruh em ha ka ba ïadei bad ka ïaid ka ïeng jong une u rangbah bad halor kine ki kam beai ki ba u la leh. Kumta halor kane ka jingleh jong u ia kum kitei ki jait kam ka ba long pyrshah ïa ka ai bad ka imlang sahlang bad u la pynjah burom ruh ïa ka kyrteng jong ka shnong. Kumta ka Shnong ka pynrem jur ïa katei ka kam be-aiñ ka jong u.
Shuh shuh na ka liang ka Executive Committee jong ka Shnong ka la maham tyngeh ruh ïa kino kino ki para shnong kiba shong hapoh shnong ne ki ba sah shabar shnong ne kiwei pat ki bar shnong ki ba shim kabu ban pynthohbria ïa ka kyrteng jong ka shnong da kino kino ki kam kiba long pyrshah ïa ka imlang sahlang, bad lada lap ïa kum kita ki ba ïaleh pyrshah yn aiti beit sha ki bor jong ka ai.Kane ka long katkum u kyrwoh lyngba u Bah S.L. Kongwang, Rangbah Shnong Umsyiem Village.
