Shillong, Nailar 26: Ka Hynniewtrep Youth Council (HYC) ha ka sngi Thohdiengi kala dawa naka North Eastern Indira Gandhi Regïonal Institute of Health and Medical Sciences (NEIGRIHMS) ban sangeh shwa ïa ka jingthep kam na ka bynta ka kam Nursing Officers ba la pynlong lyngba ka Nursing Officer Recruitment Eligibility Test (NORCET)-5.
Haka shithi sha u Director of the NEIGHRIHMS u President ka HYC bah Robertjune Kharjahrin ula ong “Kane ka jingpynkylla ka NEIGRIHMS na ka rukom ba la ju leh ban thungkam ka dei tang ka buit ban pynduhlad ïa ki trai ri trai muluk ban ïoh kam kum ki Nursing Officers ha kane ka Hospital”.
U bah Robert ula ong katkum ka jingtip ba la ïoh na ka AIIMS-New Delhi lyngba ka Notice dated 05.08.2023 la khot na ka bynta ban thep kam lyngba ka NORCET-5 na ka bynta ka kam Nursing Officer ha AIIMS New Delhi bad ha kiwei ki AIIMS katkum ka jingdon ki jinglait kam.
Ka sngi ba khatduh ban thep ïa ki Online Applications ka dei haduh 5 baje haka 25.08.2023, ka Exam kan long haka 17 tarik Nailur 2023 {Online (CBT) naka bynta ka Stage I NORCET Preliminary} bad haka 27 tarik Risaw 2023 {Online (CBT) na ka bynta ka Stage II NORCET Mains}.
“Kynsan kynsan ka AIIMS New Delhi lyngba ka jingpyntip Notice-200/2023 dated 25.08.23 hapoh ka Website ka la pyntip ba ka jingpyntip lyngba ka Notice No. 146/2023, NEIGRIHMS, Shillong ka shim bynta ha ka NORCET-5 bad ka sngi khatduh ban phah ïa ki Online Forms ka dei haka 28.8.2023 da ka ba kdew ruh ïa ki jingdon ki kam ba lait”.
Nalor kane lyngba ka Notice No. 200/2023 ba la pynmih ha ka Officïal Website jong ka AIIMS New Delhi ka kdew bad ka shai ba ka por ka long kaba khim ban phah ïa ki Application namar ki samla ka jylla ki dang shu tip shen halor kane ka jinglait kam. Haba kynnoh ba kane ka dei tang ka buit ban pynduh lad ïa ki samla, u bah Robert ula ong “Ngi dawa ba ka Notice No. 200/2023 da ka AIIMS New Delhi dei ban pyndam noh bad ka jingthep kam lyngba ka NORCET ruh dei ban pynsangeh shwa”.
“Ngi dawa ruh na ka NEIGRIHMS ban pyntip kham kloi halor ka jinglait kam bad ban shim ki lad lynti kumno ban ai jingpyntip kyrpang ïa ki samla ka jylla halor kane ka rukom thep kam bad ai ka jingpyntip ba lait kam ruh dei ban phah pynmih ha ki kot khubor” ula ong.
Nalor kane ka HYC kala byrngem ruh ban ïa khih lada ka NEIGRIHMS kam sngap ïa ka jingdawa ka seng.
