Pynsangeh shwa shipor ka Ïingbishar ïa ka hukum ka KHADC ban wengkam ïa 13 ngut ki nongtrei

Shillong, Jylliew 16: Ka Meghalaya High Court ha ka sngi Nyngkong ka la pynsangeh shwa shipor ïa ka hukum ba la pynmih da ka EC ka Voice of the People Party (VPP) ha Khasi Hills Autonomous District Council (KHADC) kaba la pynmih ha ka 29 tarik u Jymmang, 2025 na ka bynta ban wengkam ïa kumba 13 ngut ki nongtrei jong ka.
Ha ka hukum ba la shim bishar ba la ujor da ka mukotduma da Lanosha Khongthiang, ba dei iwei na ki nongtrei ba la mad ïa kane ka jingeh na kane ka jingpynmih ïa kane ka hukum, ka meij ba marwei ne ka single bench ba la khlieh da Justice B Bhattacharjee la ong, “Haba phai sha katei ka hukum ba la pynbna halor, ha kane ka por ka long kaba bha ban pynsangeh shuwa shipor ïa ka impugned Office Order No.345 kaba
29 .05.2025 tat haduh ban da poi biang ka tarik ba la buh.”
La pynsangeh noh ïa ka kam Peon ba la trei da Lanosha hadien ba la trei kumba 4 bnai.
“Ïa kane ka impugned Office Order, prima facie, kam shym la pyni ba kane kaba ujor kan ïoh ka jingpynbna ne ban ïoh ka lad ban pynsngew ne sngap ha shwa ban shim ïa ka rai ba kan shah pynduh noh ïa ka kam kaba ka la trei kum ka peon,” ong ka meij u nongbishar.
Kham mynshwa ha ka 12 tarik u bnai Jylliew, ka High Court ka la pynsangeh ïa ka order pynsangeh kam ba la pynmih da ka EC ka KHADC ha ka 30 tarik u Jymmang, kaba la weng ïa ki nongtrei kiba la ïoh ïa ka regularisation kiba don kumba 30 ngut kiba trei ruh kum ki casual.
Ha ka 3 tarik u Jylliew pat u CEM ka KHADC u Bah Shemborlang Rynjah u la pyntip ba ka EC jong u ka la pynsangeh noh ïa ki 13 ngut ki nongtrei kiba dang shu shah thung thymmai bad weng ruh ïa ka jinglong permanent jong ki 30 ngut ki nongtrei casual ha kaba la thung ïa ki khlem ki kam ba la mang.