Shillong, Ïaïong 07: Ka Meghalaya Public Service Commission (MPSC) kaba long ka bor ba ha khlieh duh jong ki eksam bad ki interview thungkam ha ka jylla, ka la pynsangeh noh shuwa ïa baroh ki eksamin bad ki interview thungkam ha ka jylla, hadien ka hukum ba la pynmih da ka ïingbishar High Court of Meghalaya.
Ïa kane ka jingpynbna ban pynsangeg ïa ki interview, la pynmih da u Chairman ka MPSC mynta ka sngi.
Lah ban kdew hangne ba ka High Court of Meghalaya ha ka 5 tarik mynta u bnai, ka la hukum ïa ka sorkar jylla ban pynsangeh noh shuwa ïa baroh ki eksam bad ki interview thungkam thungkam, namar ba jingbym don ka Roster System ha ka State Reservation Policy.
Kane ka rai jong ka ïingbishar, kaba lah ban ktah jur shipor ïa ka jingthungkam ha ka jylla, ka ong ba ka Reservation Policy jong ka jylla kam don satia ïa ka Roster System. (Roster System kadei ka jingtreikam, ne jingbuh jingkheiñ kaba shai kaba da pyni shai lada khot aplikeshon, katno ngut la mang na ka bynta ki jaidbynriew kiba la buh da ka Reservation Policy).
Haba shim bishar ïa ka mukotduma ba la ujor da ka Zanera R. Marak bad kiwei ba la mihkhmat da arngut ki nongsaid aiñ, u AS Siddiqui bad u AG Momin, ka ïingbishar ka la pynpaw ka jinglyngngoh ba kumno ka jylla ka pyntreikam ïa ka Polisi bhah thungkam mynta la sanphew snem khlem ka Roster System. “Kane ka pynpaw ïa ka jingbieit bad ka jingbym ler treikam ki ophisar IAS, kibym shym la peit ne ïohi ïa ka jingdonkam kane ka System shuwa ban pyntreikam ïa ka Policy”, la ong ka ïingbishar ba kynthup ïa u Chief Justice, u Sanjib Banerjee bad u Nongbishar W. Diengdoh.
Da kaba pynpaw ba kane ka buh ka jingma kaba khraw namar kane, ka ïingbishar ka ong ba kane ka lah ban lam sha ka jingleh shiliang khmat bad ka jingleh donbor ha ka thungkam thungjam. “Nakata ka daw, ngi la idei ban pynsangeh lut ïa baroh ki jingthungkam ha ka jylla katba kam pat don kane ka System”, la ong kine ki arngut ki Nongbishar badonburom ha ka hukum ba la pynmih mynta ka sngi.
Ka ïingbishar ka la ban ruh ba kane ka jingsangeh thungkam kan treikam ha baroh kawei ka jylla, kynthup ruh ïa ki karkhana bad kiwei kiwei de ki bor bad treikam kiba pyntreikam ïa ka Reservation Policy.
Shuh shuh ka ïingbishar kala bthah ruh ba kan shim jingbishar biang ha ka 20 tarik mynta u bnai, bad la bthah ruh ba kane ka hukum kadei ban poi sha ka Chief Secretary ka jylla bad ha kine ki artaïew, kan hap ban jubab kiei ki ki lynti ba ka sorkar ka la shim.
Ka ïingbishar kam shym la map ruh wat ïa ka jingthungkam ha High Court ruh, ha kaba ka la pynpaw ka jingbymhun halor ka jingthungkam ha kane ka ïingbishar ha ki shiphew snem ba la leit, namar ym shym la batai shai balei ba kiba leh kham bha kim shym la ïoh ïa ka kam, tang ka daw ka jingpyntreikam ïa ka Reservation Policy.
U Advocate General jong ka jylla uba don lang ha kane ka jingbishar ruh u la pynpaw ba ka long kaba eh ban pyntreikam ïa ka Reservation Policy, khlem ka Roster System.
