Khliehriat, Risaw, 28: Ki dkhot jong ka Jaiñtia National Council (JNC) Western Zone hapoh ka jingïalam u President u samla Hamehi Bamon ha ka Lah Sngi u Blei ki la leit ban pynsangeh mardor ïa ka jingpyntrei ïa ka surokbah National Highway-6 ha ka shnong Soomer, West Jaiñtia Hills District namar ka jingpyntrei kaba khlem sngewthuh.
U kyrwoh na ka seng u ong, wat hapdeng ka jinghap slap bad jingdap um ka surok ki nongtrei ki shym la patiaw satia hynrei ki dang ïai trei ïa ka kam watla ka rong ba la siang surok ruh ka la shu dap da u pum pum.
“Ka surok ka dei u thied snam jong ka roi ka par bad ka leit ka wan jong ki paidbah bad shu shna ne pyntrei ïa ka surok tang dep rukom ka long kaba ym lah satia ban pdiang,” la pynpaw ka JNC-WZ.
Kum ban shu pynkynmaw, dang ha kine ki khyndiat taiew ka seng ka la ïakynduh markhmat bad u MP ka Shillong u Dr. Ricky AJ Syngkon, kata ha ka 7 tarik mynta u bnai bad ka seng ka la kyrpad ïa u ban ïakren bad ka Sorkar Pdeng na ka bynta ban pynbha ïa ka surokbah National Highway-6.
Ka seng ka la kyntu ïa ki nongtrei ba ki dei ban pied noh ïa ka rong ba ladep siang hapdeng ka jingshlei um bad la bthah ba kin siang noh da kawei.
Ka seng ka la kyntu ruh haba shna ïa kane surok dei ban shna katkum ki kyndon ba la buh da ka Ministry of Road Transport and Highways hynrei ym ban shu shna katba lap katba shem namarba ka pisa ba la pynlut hangne ka dei ka pisa jong u paidbah na kata ka daw kiba pyntrei ki hap ban pynbiang ïa ka jingangnud jong ki paidbah.
Ka JSU ka la ong ba kan sa nang ïai buddien ïa ka jingpyntrei ïa kane ka surok.
