Shillong, Nohprah 15 : Ka Joint Action Committee Muster Roll Worker Union (JAC-MRWU) kala pynsnageh noh shwa ia ka jingiakhih kaba la thmu ban pynlong ha ka 16 tarik hapoh Madan Malki, da kaba burom ia ka jingkular u Myntri Rangbah ka jylla u Conrad K Sangma kaba la ai bad phah ktien sha ki.
Haba kren bad ki lad pathai khbor u Bah Bympher Lyndem uba dei u General Secretary JAC-MRWU u la ong ba kane ka jingsangeh ia kane ka jingiakhih kadei ka jingkyrpad u Myntri Rangbah ban ym iakhih bad shen un sa khot ia ki sha ka miej jingia kren halor ki mat jingdawa jong ki.
Ia kane ka jingiakhih la thmu ban pynlong lashai ka sngi ka 16 tarik u Nohprah ha Madan Malki ha kaba iadei bad ka mat jingdawa halor ka floor rate bad ka VDA nalor kiwei kiwei de ki mat jingdawa.
U Bah Lyndem u la ong, kila pyrshang ban buh ia ka appointment ban ia kynduh ia u Myntri Rangbah hynrei bad la ai por ban jubab ne khot ia kren ia ki ha lane shwa ka 15 tarik u Nohprah bad lada kim ioh ia kano kano ka jubab ka JAC kala pynkhreh ban ia khih.
“Dei ha ka 9 tarik mynta u bnai u Chief Adviser jong ka JAC u Bah KL Pariat u la ioh ban ia kynduh mar khmat bad u Myntri Rangbah u Conrad K Sangma bad la ioh ban pynsngew ha kaba iadei bad ka memorandum bad ka appointment bad ki Muster Roll Worker Union bas u la kyntu ia ki ban ym ïakhih hynrei u la pan por na ki hadien u snem thymmai” u la ong bad bynrap ruh “kane ka jingpynsangeh noh jong ka JAC ïa ka jingiakhih kadei namar ba ki burom ïa u myntri rangbah bad ki ngeit skhem ba un bat iaka jingkular”.
Na ka liang jong ka JAC kala ai khublei ruh ia u Conrad bad ia ka kynhun myntri sorkar kaba la pyntrei kam biang ia ka 50 % reservation na ka bynta ki RCW kat kum ka Regular Casual Worker Scheme 1996 bad ki ngeit ruh kumba ki ioh ia ka Floor Rate Arear 2018, kumta mynta ka kynti ruh ki don ka jingngeit ba skhem ba kin ioh ia ka Floor Rate Arear NADUH U Risaw 2023 ryngkat bad ka VDA.
Ha kajuh ka por ka JAC kala kyrpad ruh ia u Conrad ban pyllait noh ia ka tulop jong ki nongtrei ka tand Sericulture bad jong ka tnad AH Veterinary kiba khlem pat ioh tulop mynta lah hynriew bnai bad la kyrpad ban pyllait ha shwa ka Christmas.
Ha shwa jong kane ka JAC kala dep ban ia kynduh ia u Labour Commissioner ha ka 3 tarik u Naiwieng halor ka Floor Rate bad ka VDA, hynrei u commissioner u la pynshai ba ka GST kala hiar dor ha kaba iadei bad ki mar bam mar dih, kumta um lah ban pynkiew ia ka VDA.
