Nongpoh, Naitung 09: U Ashwini Srivastava, Joint Secretary (Sugar), jong ka tnad Food and Public Distribution jong ka sorkar India mynta ka sngi u la wan ban iuhkjat ha Ri-Bhoi District ban wad jingtip halor ka jingpyntreikam ïa ki skhim marbam khamtam ka rukom sam ïa ki rashon sha ki paidbah.
Kane ka jingleit jngoh ka la sdang da ka jingleit jurip ïa ka Community Health Centre (CHC) ha Umsaw Nongkharai, ha kaba u Srivastava u la ïakren bad ki nongtrei ka koit ka khiah bad ki ophisar ban sngewthuh ïa ka jingïadei hapdeng ki jingshakri ha ka liang ka koit ka khiah paidbah bad ki prokram ai jingïarap kiba ïadei bad ki marbam.
Nangta u la leit sha ka dukan sam rashon ha Mawtnum, ha kaba u la ïakren beit bad ki nongshong shnong bad ki nongïoh jingmyntoi ban lum ïa ki jingai jingmut halor ka jingsam ïa ki marbam ba kongsan hapoh ka PDS. Kiba bun ki nongïoh jingmyntoi ki la pynpaw ïa ka jingsngewhun ïa ka rukom treikam kaba la don lypa hynrei ki la buh ruh ka jingkyrpad ban pynrung ïa ka shini ha ka thup jong ki mar rashon ban sam sha ki paidbah namar kumba long mynta ki paidbah ha ka jylla kim ioh satia ïa ka shini rashon.
Ïa kane ka jingleit jngoh la pynkut da ka jingialang kaba la long ha iing Dorbar ka shnong Pahamsyiem, ha kaba ki paidbah kiba ioh jingmyntoi bad ki ophisar na ka district ki la ïakren ïa ki jingeh, bad ban nang pynbha ïa ka rukom sam mar bam sha ki paidbah bad ki jingshakri kiba ka sorkar kan ai sha ki paidbah.
Haba kren sha ki lad pathai khubor u Srivastava u la ong ba kane ka jingwan iuhkjat jong u ha Ri-Bhoi District ka long ban wad jingtip ïa ka rukom pyntreikam ïa ka Public Distribution System ne ki rashon ka sorkar ka ai sha ki paidbah, bad kumno ki paidbah ki ioh jingmyntoi ban lum jingtip beit na ki trai kiba ioh jingmyntoi ba ka jingsam rashon ka dei kaba khlem siew pisa bad ha ka por kaba biang.
U la ïathuh ruh hadien ka jingleit jurip ïa ka dukan rashon bad ka jingkynduh bad palat 50 ngut ki nongioh jingmyntoi bun ki la pyntip ba ki sngewhun ïa ka rukom pyntreikam bad ka jingsam ïa ki rashon, ha kaba ki ioh kumba la mang ryngkat ka jingpyndonkam ïa u Aadhaar, hynrei tang kawei ka jingkyrpad jong ki ka long ban kynthup lang ruh ïa ka shini ha ka thup ka jingioh rashon namar kumba long mynta ka jylla Meghalaya kam pat ioh satia ïa ka shini ha ka thup ka jingioh myntoi ki paidbah lyngba ka rashon bad u la kular ruh ban ïakren bad ki bor ba dei peit halor kane ka bynta khnang ba ki paidbah ka jylla Meghalaya kin ioh jingmyntoi sa ka shini ha ka thup rashon.
