Pynrung kyrteng ka Meghalaya haduh 817 tylli ki shnong bad 427 tyli ki dong ha ka MRSSA

Shillong, Rymphang 19 : U Myntri Rangbah ka Jylla Conrad K Sangma ha ka sngi Palei u la pyntip ba ki la don haduh 817 tylli ki shnong bad 427 tylli ki dong kiba la dep ban rejistar hapoh ka Meghalaya Residents Safety and Security Act (MRSSA), 2016, watla ka jingtreikam haduh mynta ka dang ïai bteng.
“Ka bynta kaba ar kaba dei ban rejistar bad peitngor ïa ki briew kiba wan sha ka jylla, kane ka bynta kan dang ïai bteng bad ïa kane nga kular ïa ka ïing,” ong u Myntri Rangbah ka Jylla haba jubab halor ka resolution ba wanrah da u Nongïalam ka Liang Pyrshah Dr. Mukul Sangma.
U Myntri Rangbah u la pyntip ruh ba naduh ba sdang ha u snem 2018 kane ka kam ka la ïaid shaid shai. Shuh shuh u ong ruh ba ka sorkar ka la pyrshang ban pyntreikam ïa ka Ain bad buh ruh ïa ki khyrdop talasi ne ki facilitation centre (entry -exit point) hynrei ka la kynduh pat ïa ka jingeh hadien ba ka Ïing Bishar ka la pynduh noh ïa ka.
Ha kajuh ka por u Myntri Rangbah u la ong ba ka long kaba donkam ban donlang kawei ka bor. “Kane ka lah ban jia tang lada ngi ai ka jingïatrei lang kaba mut donkam ïa baroh ban snohkti lang,” u la ong.
Shuh shuh u ong ruh ba kane ka sienjam kadei kaba radbah bha khamtam haba ka Meghalaya ka don haduh 7,000 tylli ki shnong ha ka jylla.
Na ka liang u Myntri Rangbah u la kular ruh ba ka kam ka la ïaid shakhmat da ka thong ba ïa kane ka jingrejistar yn pynïar ruh wat sha kiwei ki bynta jong ka jylla.