Shillong, Nailur 08: Ki nonghikai skul ha ki Deficit pattern school hapoh ka ka lama All Meghalaya Upper Primary and Secondary Deficit Pattern School Teachers Association (AMUPSDPTA), ha ka sngi Balang ki la dawa ba ka sorkar ka dei ban pynkylla pura noh ïa ki 13 tylli ki skul kiba ym shym la rung sha ki deficit ba pura ha u snem 1989 khnang ba ki nonghikai bad ki nongtrei ha kine ki skul kin ïoh lang ki jingmyntoi kumba ïoh ki nonghikai deficit ba pura.
Haba kren sha ki lad pathai khubor U General Secretary ka AMUPSDPTA u Lindas Sangma u la ïathuh ba ha ka jylla ki don 13 tylli ki skul kiba dei ki deficit pattern ha ka jingshisha ki la dei ban rung kum ki skul deficit ba pura naduh u snem 1989 hynrei na ki daw kiba ym tip ba ka sorkar ha kato ka por kam pynrung ïa kine ki skul.
U Lindas u la ïathuh ba ha ka jylla ki skul ba dei ki Deficit Pattern ki don 13 tylli ha kaba 9 ki dei ki Secondary School bad 4 tylli ki Upper Primary ha ka jylla baroh kawei.
U la ong ba ki nonghikai bad ki nongtrei kiba don ha kine ki skul ki don 127 ngut ha kaba 85 ki dei ki nonghikai bad 17 pat kum ki nongtrei ha skul(Non-Teaching Staff) jong ka kyrdan Secondary. Ha ka kyrdan Upper Primary 21 ngut ki dei ki nonghikai katba 4 pat kum ki nongtrei ha skul.
Shuh shuh u la ong ba ki nonghikai ha kine ki skul ki la ïoh tulop Deficit Pattern naduh u snem 1993 bad ka ïai neh haduh kat mynta tang ha ka deficit pattern.
“Kito ki skul kiba rung Deficit pura ha lane shuwa u snem 1989 ki ïoh ïa ki jingmyntoi kiba bun ba kynthup naduh ka bai bam tymmen, ka bai iing bad kiwei kiwei ki jingmyntoi katba ma ngi pat ki Deficit Pattern ngi ïoh beit thik tang ka tulop bad ka Dearness Allowance” u la ong.
U Lindas u la bynrap ba ha ka jingshisha ki kam kiba ka sorkar ka ju bthah ïa ki nonghikai deficit ba pura ïa ki ruh ka ka ju phah lang bad ka kam kaba ki leh ruh ka ïa ryngkat bad ki nonghikai deificit ba pura na kata ka daw ua la ong ba ka long kaba shongnia ba ka juh ka jait kam dei ban ïoh ruh kajuh ka jingsiew.
“Lada phi peit ïa kiwei ki kyrdan jong ki nonghikai ka sorkar ka la kyntiew ïa ka jingsiew jong ki wat la ki la bun ngut bad ka jinglut kaba ka hap pynlut kan heh bha lada nujor bad kaei kaba kan hap pyllut lada ka kyntiew ïa ngi sha ka kyrdan deficit pura. Kan eh aiu ïa ngi tang shi klur tam shisnem kan hap pynlut tam na kaba ka ju pyllut” u la ong.
U la ïathuh ruh ba na ka liang ki nonghikai ki la leit ban ïa kynduh bad u Myntri Rangbah ka jylla, u Symbud Myntri Rangbah bad uh u Myntri ba peit ïa ka tnat pule puthi hynrei na ka liang jong ki kim shym la ai jingkular kaba shai bad thikna ki shu ai jingkyrmen beit ba kin sa peit ïa kane ka kam.
“Ngi kwah ba a kumno kumno ha kane ka dorbar synrai ka sorkar ka dei ban pynurlong ïa kaba ngi dawa lymda kumta ngin hap shim da kiwei pat ki sienjam” u la bynrap.
