Shillong, K’Lyngkot 27 : Ka la mih ka jingpynrem kaba jur na kiba bun balang halor ka jingphriang ki jingthoh byrngem ïa ka shongsuk shongsaiñ jong ki paid Garo.
Halor kane na ka liang u Myntri ka tnad PHE, Marcuise ula ong ba kum u nongmihkhmat bad khamtam kum u nongshong shnong na ka jaidbynriew Garo u pynrem jur halor kane ka jingpyntieng pynsmiej ïa ki paid nongshong shnong.
“Kum kine ki kam ban wanrah ka jingtieng jingsmiej bad ka jingïapait ha ka imlang sahlang kim dei ban ïoh lad ha ki jaka jongngi. Ka Meghalaya ka ieng na ka bynta ka suk ka sain, ka jingïa burom lang bad ka jingïatylli jong baroh ki jaidbynriew kam pher la ki dei na kano kano ka kynhun niam ruh,” ong u Myntri ha ka kyrwoh.
Nalorkata, u la ïathuh ba la pyntip ruh ïa ki bor distrik ban peitngor bad ban thwet mardor ïa kito kiba donkti ha katei ka kam beaiñ.
“Nga kyntu ïa baroh ba kin long jai jai, ïa tylli bad kiba peitngor bad shaniah ha ka sorkar ban ïada ïa ki paidbah bad ïa ka jaka jongngi,” u la ong.
Ha kajuh ka por na ka liang ka BJP ka la pynrem jur halor ka jingmih katei ka jingthoh ha kaba la pyntieng pynsyier ïa ki paidbah nongshong shnong jong ka rilum Garo.
“Na ka liang ka BJP ka kyntu ïa ka sorkar ba kan shimkhia mardor bad kyntu ruh ïa baroh ki nongshong shnong ban long kiba peitngor khnang ba ki kam bymman na shilliang pud kin ym ïoh jaka. Ka BJP State Unit ka kyntu ruh ïa ka sorkar pdeng ba kan shimkhia mardor ïa kane ka kam ,” ong ka kyrwoh ba la phah da u Bah
Wankitbok Pohshna, State General Secretary jong ka BJP Meghalaya Pradesh.
Shuh shuh la ong ruh ba ka BJP ka shim ruh ba kane ka jingbyrngem kam dei satia tang ïa ki paid Garo hynrei ka dei lang ïa baroh ki paid Khasi bad Jaintia bad kumta kum ka Jylla ka dei ban tylli lang ban ïada ïa baroh ki nongshong shnong.
Kane ka party ka kyntu ruh ïa baroh ki nongshong shnong jong ka Meghalaya bad baroh ka thain shatei lam-mihngi jong ka Ri ba kin ïa tylli lang kawei da kaba iehnoh shadien ïa ka jingsngew ïapher hynrei ban long kum kawei ka bor ban pynïoh ïa ka jingshngain ki iing ki sem.
