Pynrem ki kynthei Katholik ba shah pynïaid lyngkhuit bad shah leh be-ijot ki kynthei ha Manipur

Shillong Naitung 23: Ka Synjuk Ki Kynthei Katholik, Shillong Archdiocese (SKKSA) da ka jingsngewkhia mynsiem, ka pynrem jur halor ka jingjia ha Manipur, ha kaba ïa ki riewkynthei lah leh bym kheiñ briew bad lah sloit ïa ka burom jong ki da kaba pynïaid lyngkhuit bad leh be-i-jot da ki riewbymman.
Ka Synjuk ka la pynlong ïa ka jingïalang ba kyrkieh ha ka 22 tarik u Naitung 2023 ban duwai kyrpang na ka bynta kito ki riewkynthei kiba la shah ktah ha ki riewbymman.
“Ngi dawa ïa ka Sorkar Kmie bad ka Sorkar Jylla Manipur ba kin shimkhia halor jong kane ka kam, ban pynshitom jur ïa kito ki riewthrang snam katkum ba shong ka aiñ namar kane ka jingjia ha Manipur ïa ki kynthei ka la pynsuhjer bad pynlehraiñ ïa ka ri India hi baroh kawei, bunsien ki kynthei hi ki kylla long ki sohpdung ha ka ri jongngi” la pynpaw ki nongïalam ka Synjuk haka kyrwoh khubor.
Ka Synjuk ka la ong ruh ba dei ban kynmaw ba ki kynthei ki long ka bor bad jingim jong ka Ri, wat nym niewbeiñ ïa ki bad wat nym pynsah dak ïong ha ka jingmut jingpyrkhat jong ki kynthei.