Pynrem ka WKSU bad WYF halor ka rai ka sorkar ban pynbeit thymmai ïa ki skul shimet

Nongstoiñ, Risaw 4: Ka seng WKSU bad ka MYF ki pynpaw ïa ka jingpynrem halor jingleh biej ha ka tnad Education DSEL jong ka jylla, ha ka jingpynbeit thymmai ha ki skul shimet, ha kaba ïadei bad ki jingpynïaid ryntih ha ki rukom thoh exam selection ha ki kyrdan class X.
“Ka sorkar lyngba ka tnad Education DSEL, ka la pynbna ba yn ym donkam thoh selection shuh ïa ki khynnah skul class X ha ki private skul, lyngba ki centre bapher ba la ithuh da ka tnad pule puthi ka sorkar kumba ju leh man u snem thoh selection. Hynrei, ki khynnah skul kin shu pynlut por ha ki kamra klas ki jong ki san kynta manla ka sngi bad ruh la ai lad ïa ki ban ym thoh selection shuh nangne sha khmat. Hynrei dei ban thoh exam final beit ha la ki jong ki jong ki skul ba ki leit ban pule”.
“Kane ka jingtip ka long katkum ki jingpyntip paidbah sha ki tnad pule puthi jong ka thaiñ kaba long katkum ka shithi ba la pynmih hukum ne ai bor da ka tnad pule puthi jong ka jylla DSEL. Phewse katei ka tnad ba dei peit jong ka jylla Meghalaya, ka la pynkulmar jingmut thlim ha ki tnat barit bad ha ki nongpynïaid skul private bad ïa ki khynnah skul khamtam eh, kiba dei jong ka thaiñ”.
“Ka khubor kaba la ïoh ka long da khongpong hapoh ka ar sngi ha shuwa ban ym thoh selection shuh kumba la dep pynbna naduh u bnai july 2024. Hynrei khala khala ka sorkar lyngba ka DSEL, kumba iuh tdong bseiñ tang ar sngi ha shuwa ban thoh selection, ka tnad pule ba ha khlieh duh ka jylla, ka la pynbna kynsan ym da ka shithi ne ka order sha ki tnad pule jong ka thaiñ kumba ju long kat kum ki riti pynïaid kam ha ki tnat sorkar” ong u bah D. Sun.
“Sngew thamula ka long ba tang da ki whattsap chat I ba rit kum I dkhiew, ha ka 1/10/2024 bad tang ar sngi ha shuwa ka selection ka ban long ha ka 3/10/2024, la phah pynban sha ki bor district ba dei peit ïa ka pule puthi, ba ki dei ban pynlong beit ïa ka selection jong ki khynnah class X bad ym ban bud shuh ïa kiei kiba la dep rai ha shuwa da ka sorkar”.
“Ka WKSU bad ka MYF ka pynpaw ka jingsngew bym ïahap halor kane ka jingleh biej da ka sorkar lyngba ka tnad Education DSEL. Ka la pynlamwir ïa ki tnad pule puthi ha ki rukom pynïaid ryntih ha ki rukom treikam bad ym tang ïa katei ka tnad, hynrei ïa ki bor pynïaid skul ki kmie ki kpa ki riew paidbah bad kaba ktah eh kan long khamtam ïa ka lawei ki khynnah skul kiba la mat ïa ki jingshah pyndik bad shah pynthlïah bad khlieh khlieh tdong tdong da ka tnad pule jong ka jylla bad khamtam ka sorkar MDA”.
“Ki ar seng ki dawa na ka sorkar jylla, ba wat ai ka jingleh biej kan pynlehraiñ ïa ka jylla baroh kawei. Khamtam ïa ki khynnah skul bad samla pule jong ka thaiñ West Khasi Hills. Lada ki ïai thurmur hi man ka por ha ka tnad pule puthi, kin kit ïa ka jinglehraiñ ha ka jylla baroh kawei. Ki ar seng halor kane ka mat kin ïai ïap khmih kaei ka ban jia hadien habud”, ong u samla D.Sun president WKSU bad H.Lyngkhoi president MYF.