Amlarem, Naiwieng 17: Ka War Jaiñtia Students’ Union (WjSU) lyngba ka Cultural Cell jong ka, kala pynrem jur ïa ka jingjia ba dang shen halor ka jingshah pynjot ki mot dur u Jisu Khrist hajan ka Syiem Jingsuk Parish, Amlarem West Jaiñtia Hills District.
Ka WjSU kala pynsngew baka thaiñ War Jaiñtia naduh ki por mynshuwa ka don hapdeng ka jingsuk, ka jingïatylli bad ka jingburom markylliang hapdeng ki jaitbynriew bad kam juh don ka jingsngewpher ñiam ha kano kano ka dur bad ïa katei ka jingleh dusmon da ki briew ba donkti ka seng kam lah ban pdiang da lei lei ruh.
Halor kane ka WjSU ka kyntu ïa ki bor pynïaid jong ka Civil Sub-Division bad ki bor pulit jong ka Amlarem Civil Sub-Division ba kin pynlong ïa ka jingtohkit kaba bniah ïa kane ka kam shah pynjot ki mot dur bad ban pynthikna ba ki nongleh kam sniew kin shah pynngat ha ki kyndon aiñ ba tyngeh.
Ha ka juh ka por ka seng ka kyrpad ïa ki paidbah ka thaiñ ban pynneh ïaka jingshongsuk, ka jingïatylli ha kum kane ka por, da kaba pynthikna ba ka mynsiem jong ka jinglong parabangeit bad ka jingïaburom kylliang kan dang khlaiñ hapoh ka thaiñ War Jaiñtia. Pynkut ka kyrwoh na u Cholki Chyrmang uba dei Cultural Secretary ka WjSU Central Body Amlarem.
