Pynrem ka VPP ïa u nongleh beaiñ ba byrngem ïa ki Enforcement da kaba pyndonkam ïa ka kyrteng ‘Ha U Prah”

Shillong, Naitung 12 : Ka Voice of the People Party (VPP) ka pynrem jur halor ka jingjia ba dang shen kata ha ka 8.7.2024 ha kaba uwei u briew u la tim la tla bad byrngem ïa ki Enforment jongka District Transport Officer katba ki dang pyndep la ka kamram ha Laitumkhrah. Une u briew ym tang ba u tim u tla bad byrngem ïa ki Enforment hynrei u byrngem ban rah hakhmat ki paidbah da kaba u pyrta ruh “ Ha U Prah. Kane ka jingleh ka long kaba isih bad kaba ym lah ban pdiang bad ki bor ka aiñ ki dei ban leh ei ei ïa une u briew, ong ka kyrwoh khubor ka VPP ba la soi da u bah Batskhem Myrboh nongpathai khubor ka party.
Haba ka VPP ka tohkit bad bud dien halor kane ka jingjia ka la lap ba utei u briew u dei pynban u dkhot jong kawei ka National Party. Ka VPP kam ju pynshlur ïano ïano ruh naduh ki dkhot haduh ki nongkyrshan ban leh ïa ki kam beaiñ bad kiba pynthut ïa ka imlang ka sahlang. Kane ka jingleh jong une u briew ka dei tang ka jingthmu jongu ban pynjah burom ïa ka VPP kumta ka party ka pynrem jur ïa une u briew bad dawa ba ki bor ka aiñ ki dei ban leh ei ei ïa u.
Nalor kane ka party ka dawa ruh ba une u briew u dei ban pan map da kaba pynmih ha ki lad pathai khubor halor ka jingpyndonkam bakla ïa ka kyrteng “ Ha U Prah” ha kane ka jingleh kulmar jongu. Ka party ka ai por ba une u briew u dei ban pan map hapoh lai sngi lyngba ki lad pathai khubor bad lada jia ba um leh halor kane ka jngdawa ka party kan sa leh da kaba tyngeh kat kum ka aiñ.
Ha kajuh ka por ka party ka banjur ruh ïa ka ki bor sorkar ba kin kham leh jai jai ha kino kino ki kam ba ki leh ym ban pyndik ïa ki riew paidbah ha ka jingpyndep jongki ïa ka kamram ba ki dei ban leh. Nalor kane ki riew paidbah ruh ki dei ban burom ïa ki bor sorkar haba ki leh la ka kamram na ka bynta ka bha ka miat jong baroh.