Shillong, Risaw 04: Ka Voice of the People Party (VPP) ka pynrem jur ïa ka sorkar MDA halor ka CM IMPACT Guidebooks kaba dei kaba la sdang bad guidebooks kaba la pynmih hapoh ka jingïalam jong u Myntri Rangbah ka jylla u Conrad K Sangma. Ka la ong ba kine ki guidebooks ka thmu ban pynbha ïa ka jingkiew ki khynnah class X ha ka Science bad Social Socience kaba phalang ka jingpulom ka pule puthi lyngba ka jingpynkylla kaba don jingmut, ha ka jaka ban shaniah ha ki superficial method kaba buh hakhmat ïa ka jinglong halor ka jingpule kaba shisha.
“Ka seng ka sngewkhia halor kine ki jingsdang ba khlem da pyrkhat ha kaba kane ka sorkar ka la pulom ban kyntiew ïa ka pule puthi lyngba ka jingai jinghikai ba biang, ka la jied ruh ïa ka lynti kaba lyngkot ban pynkiew ïa ki pass percentage khlem da pynleit jingmut ïa ki jingsngewthuh ba shisha ne ka sap jong ki khynnah pule. Halor ka jingai ïa ki syrnot ne Producing Certificate Holders, ym ban pynkupbor ïa kiba dang pule ne Not Empowered Learners, kane ka pynleit jingmut tang ban pynmih ïa ki certificate holder ha jaka ba ki samla pule kin ïoh ki lad ha ki rukom pyrkhat pyrdaiñ kiba bha bad kiba lah ruh ban shim ïa ka rai halor ki jingeh lyngba ki buit kiba kongsan ha ka jingim jong ki bad ha ki higher education,” ong u Nongaiktien ka VPP u Dr Batskhem Myrboh ha ka kyrwoh khubor.
Ha kaba ïadei bad ka mat ba pynhiar dor ïa ki nonghikai ne Undermining Teachers, ka seng ka la ong ba ka jingpynmih ïa kane ka guidebooks ka la pynhiar dor ïa ka jinglong ba shemphang jong ki nonghikai, kaba mut ba ki don kam ïa ki “cheat sheets” ban hikai ïa ki khynnah pule, kumta ka la pynduh suki suki ïa ka jinglong laitluid ha ka kam. Ha kaba ïadei bad ka phang ba duna ka jingshai ha kaba pynkhreh ïa kane ka guidebook ne Lack of Transparency in Guidebook Preparation, ka seng ka la ong ba kane ka kam ban jied ïa ki nongnoh synniang ne contributor ïa kine ki guidebooks ka la sah thylli. Ka pisa paidbah kaba ym dei ka pisa shimet jong u Myntri Rangbah, kaba la pyndonkam, bad ki paidbah ki donkam ïa ka jinglong kaba khuid ha kaba kumno la pynlut ïa ka.
“Halor ka jingleh politik ha ka pule puthi, ban ai kyrdan ïa ki guidebooks da ka kyrteng “CM” ka long kumba pynlong politik ha ka kam pule puthi, ka ban pynlong ïa ki samla pule kum ki atiar ban ïoh myntoi saiñ pyrthei ha ka jaka ban pynleit jingmut ban kyntiew ïa ki. Ha kaba ïadei bad kane ka VPP ka ong ba dei ban pynkut noh ïa kine ki guidebooks, naba ki pynhiar dor ïa ka jingkiew ka pule puthi. Ka dei ban don ruh ka jingpynkylla bad dei ruh ban kyrshan ïa ki nonghikai bad ban pynkupbor ïa ki samla ha ka pule puthi ym tang ban shu pass beit ha ki eksam,” ong ka VPP.
Kumta na ka liang ka VPP ka kyntu ïa ka sorkar MDA ban pynleit jingmut na ka bynta ka pule puthi kaba neh bad ban peit ruh ïa ki kam jingtei ïa ki jaka pule, ka jingai jinghikai ïa ki nonghikai bad kiwei, ha ka jaka ban buh hakhmat ïa ka jingpule kaba lyngkot tang ban myntoi mano mano, ong ka kyrwoh na u Dr. Batskhem Myrboh, nongaiktien ka VPP.
