Shillong, Naitung, 09: Ka Thma u Rangli Juki (TUR) ka la pynrem jur ïa ka jingpynmih hukum jong ka Sorkar ban khang kamai ïa ki Rapido ha ki surok ka nongbah Shillong.
“Ka TUR ka pynpaw ïa ka jingkyndit kaba jur ban ïohi ïa ka hukum jong ka tnat Transport ka Sorkar Meghalaya ban pynshitom bad khanglad ïa ki briew bad khamtam ïa kito kiba im ja kpoh bad kamai da ki Scooty ne thuk thuk ar shaka ban leit buh ne on briew kylleng ki jaka hapoh ka nongbah,” ong u kyrwoh na ka TUR.
“Kane ka lad kamai jakpoh lyngba ki thuk thuk ar shaka ka wan ha ka por kaba hiran bad ka por kaba kyrduh tasam ki kam ki jam. Kumta ka la ïarap shibun bad long kawei pat ka lad ai kam ïa kiba bun bah ki samla. Nalor nangta ka la long ka jingmyntoi ïa ki nongleit nongwan kiba beh kam kylleng ka Nongbah,” ong ka TUR.
“Kane ka hukum ka pynïap thngan ïa ki samla bad ka iing ka sem jong ki,” la kynthoh ka TUR.
Ka TUR ka pynrem jur ïa ka Sorkar Jylla bad ka dawa ba ka tnat Transport kan weng noh mardor ïa kane ka hukum. Ha kajuh ka por ka TUR ka dawa ba ka SorkarJylla kan pynbeit ïa kane bad buh ki kyndon ïa ki nongpynïaid jong kane ka lad kamai bad ban ïada ïa ki samla nongtrei kiba im ja na kane ka kam ba ki dei ban ïoh ïa ki hok jong ki kum ka Provident Fund, ka Insurance, ka Risk Allowance, ki shuti bad kiwei de ki hok.
