Pynrem ka SRSN ïa ki runar kiba thang ïa ka kali ha u Acting Syiem ka Hima Nobosohphoh

Mawkyrwat, Nailur 28: Ka Synjuk ki Rangbah Shnong Hima Nobosohphoh ryngkat u Acting Syiem ki la lum ïa ka jingïalang ha ophis treikam ïa kren halor ka jingshah thang ka kali jong u Acting Syiem ka Hima Nobosohphoh bad pynrem jur ïa ki runar kiba la leh ïa kane ka kam bymman.
U Secretary ka Synjuk ki Rangbah Shnong Hima Nobosohphoh Bah Bokstone Thongni haba kren sha ki lad pathai khubor hadien ba la wai ka jingïalang u la ong na ka liang ki Rangbah Shnong jong ka Hima Nobosohphoh ki pynrem jur ïa ka jingleh kam riewkhlaw jong ki katto katne ngut ki briew ha kaba ki la thang dusmon ïa ka kali jong u Acting Syiem khlem da tip kaei ka daw.
Ym tang kata, ula ong ruh ba ka jingleh jong kine ki briew ka la pynjem rngiew ruh wat ïa ka hima baroh kawei namar kum kine ki kam kim ju jia koit hapoh jong ka hima.
Ka Synjuk ka la kyntu jur ïa ki bor jong ka aiñ ba kin thwet mardor ïa kum kine ki briew kiba leh ïa ki kam runar bad kem ruh ïa ki khnang ba nangne shakhmat kiba kum kine ki jingjia kin ym jia shuh bad lada ki bor jong ka aiñ ki kheiñ sting kan sa nang pynkharoi ïa ki kam runar bad ïoh kan poi ka por ba kim salia shuh ban shim wat ïa ka jingim briew.