Nongpoh, Ïaiong 02: Ka shnong Khyndewso mynta ka sngi kala pynpaw ka jingsngewkhia halor ka jingjia kaba laa mih haka shnong Jatalong ha Ri-Bhoi hadien ba 4 ngut ki samla khasi kila shah shoh pynmyn saw bad kiwei pat kila myn saw malu mala.
Haba kren sha ki nong thoh khubor mynta ka sngi u Bah Nicholas Malai Rang bah Shnong ka Khyndewso u la ong ba kum ka shnong ka pynrem jur bad pynpaw ka jingsngewkhia halor katei ka jingjia bad katei ka dei ka jingthmu ban pynïap klep ïaki samla khasi bad ban thombor beit ïaki.
U la ong ruh ba ka jing jia hynnin ka miet ka dei tang hapdeng katto katne ngut hynrei balei ba ki Nepali ki mih syndon puk ban thombor pyrshah ïaki samla khasi lada kim don kano kano ka jingthmu kaba sniew.
U la ong ruh ba lada don kano kano ka jingbakla kila dei ban ïakren da ka ktien bad ka jingsngewthuh jingmut hynrei katei ka jingleh riewkhlaw jong ki Nepali ban ktah kti nyngkong ïaki khasi ka long ka bym lah ban pdiang da kaba bynrap ruh ba kum ka shnong ka pynrem ïa katei ka jingjia ba wanrah ka jingthud haka shongsuk shongsaiñ ki paidbah katba ka sorkar ka dang ïaleh ban pynbeit pud bad kyrmen ba ka suk ka saiñ kan wan biang ha katei ka jaka hadien ba ki bor jong ka aiñ kila leh ïaa kaba donkam.
Kumba shi kynhun ki samla kiba la kah durkhmat mynta ka sngi kila leit ban thombor ïaki bar jylla kiba shong iew haTyrso tang hadien ka jingkynad kaba la mih haka shnong Jatalong ha Ri-Bhoi hadien ka jingshah shoh pynmynsaw ki samla khasi.
Katkum ka khubor bala ioh lum mynta ka sngi ka dei ka iew Tyrso, ha kaba kila don kumba katto katne ngut ki samla kiba la kah durkhmat bad leit ktah kti beit ïaki bar jylla kiba shong iew kaba la wanrah ruh ka jingmynsaw.
