Shillong, Naiwieng, 16: Ka Meghalaya Pradesh Mahila Congress (MPMC) ka la pynrem jur ïa ka jingbym suidñiew shuh da ki Pulit kiba ïa synran ïa ki High-level sha ka tamasa Cherry Blossom ha ka janmiet sngi Thohdieng.
Ha u kyrwoh ba la phah sha ki lad pathai khubor ka State President jong ka MPMC ka Kong Joplyn Scott Shylla ka la ong, “ngi pynrem jur ïa ka jingbym suidniew shuh da ki Pulit kiba ïa synran ïa kita ki High-level sha ka tamasa Cherry Blossom ka janmiet sngi Thohdieng. Ka jingjia bad jingleh jong u Pulit uba ñiah ïa ka kali Mahindra Thar ula dei ban shah sospon bad pynduh kam syndon.”
“Ka Mahila Congress ka dawa ba ka Sorkar ba ïalam da ka NPP ba ka dei ban siew ïa ka jingduhei ka mynsiem jong utei u samla. Ka seng ka pynrem jur ïa u Myntri Rangbah ka Jylla u Conrad K. Sangma u bym shym la phah tohkit lane ban leh eiei halor kane ka jingjia,” ong ka President ka MPMC.Ka Mahila Congress ka phah ïa u kyrwoh sngewlem bad kumjuh ruh ka ai mynsiem lyngba ki jingdwai ïa ka longiing longsem jong u Hudderfiel Rymbui na ka shnong Nongtalang ba U Blei Un don ryngkat bad ki.
Kum ban shu pyntip hangne ba u samla Hudderfiel Rymbui u la duhei ïa la ka jong ka jingim bad kawei pat ka samla ka la mynsaw jur haba ka thuk thuk kaba ki shong kaba don ïa u nombar ML05-AD-0566 ka la shah syllad ha ka kali kaba synran ïa ki heh ki haiñ kiba ïabeh ban leit sha ka tamasa Cherry Blossom ha Bhoirymbong Ribhoi District ha ka janmiet sngi Thohdieng.Katkum ka khubor ba la ïohlum la ïathuh ba kane ka la jia ha ka por 5:30 baje eiei janmiet ha ka thain Umsaw hajan ka ophis ICAR.
Ïa kine ki samla la pynkit noh sha Holy Cross Hospital kaba don ha Umsaw, Ribhoi District hynrei ki doktor ki la pynbna ba u samla H. Rymbui ula khlad noh na kane ka sla pyrthei.
