Shillong, Nailur 17: Kum shi bynta ban pynpaw ïa ka jingsngewlem ïa ki jaidbynriew Meitei ha ka jylla Manipur, kiba la mad ïa ka jingduh kaba khraw namar ka jingïaumsnam, na ka liang ka Manipuri Elders’ Consortium Shillong (MECS) ha ka sngi U Blei ka la pynlong ïa ka jingïakhih ha kaba ka la pynrem jur ïa ka jingpyndonkam da ki drone bad ki tiar pynbthei ha ka ban thombor ïa ki bor ai jingïada bad ïa ki nongshong shnong ka Manipur.
La ïohi ba ïa kane ka jingïakhih la pynlong ha Manipuri Rajbari ha Shillong, ha kaba ki paidbah ki la rah ïa ki jingthoh kiba don ïa ki kyrwoh kum ka “Pynneh biang ïa ka Internet ha Imphal” bad “Sangeh ka jingpynïap ïa ki Meitei kiba lui lui.”
Ha kaba ïadei bad kane na ka liang u President ka MECS u N. Munish Singh, ula banjur ïa ka jingdonkam kyrkieh ba ka sorkar pdeng kan pynthikna ban ai jingshngaiñ ïa ki paidbah kiba sah ha ki shnong ha nongkyndong. Kane ka jaidbynriew ka don ruh ïa ka jingthmu ban phah da ka jingthoh sha ka sorkar pdeng ban tuklar mardor bad ban kyrshan ïa ki paidbah kiba la mad ïa ka jingeh.
Lah ban ong ba kane ka jingïakhih kadei hadien ba ka la mih ka jingïakynad ha Manipur kaba la ïaid mynta sha ki 16 tylli ki bnai, ha kaba la duh ïa ka jingim jong ki 250 ngut ki briew, bun bah kiba la mynsaw bad palat 60,000 ngut ki briew kila hap ban kynriah ïa ka jaka sah ka jongki.
U Singh ula kyntu ïa ka sorkar ban shim mardor ïa ki sienjam ban wanrah biang ïa ka shongsuk ha Manipur.
Lah ban ong ba na ka liang ka sorkar Manipur ka la pynjari ïa ka jingkhang ïa ka Internet hadien ba ka la mih biang ka jingïakhih bad la pynjari ruh ïa ka curfew ha ki katto katne ki district.
