Pynrem ka JSU ïa u Bah Ardent ba thmu ban weng noh ïa ka jaitbynriew Pnar na ka SRP 1972

Shillong, Rymphang 28: Ka Seng Samla pule ka Jaiñtia Student Union ka la pynrem jur ïa u Bah Ardent Basaiawmoit u President jong ka VPP halor ka jingthmu ban kyntait bad ban weng noh ïa ka jaitbynriew Pnar ne Jaiñtia na ka Reservation Policy jong u snem 1972.
Ka JSU ka ïeng pyrshah halor kane ka jingthmu ïa ka ban weng noh ïa ki Pnar ne Jaiñtia ha ka ban ithuh ïa ki kum ki nongshong shnong hapoh ka jylla Meghalaya. Ïa ka Meghalaya ka kynthup ïa ki lai tylli ki jaitbynriew kita ki long ka jaitbynriew Khasi – Jaiñtia bad Garo.
Ka JSU lyngba ki pathai khubor ka batai shai ba ïa ka Autonomous District Council la ithuh da ka sorkar India kaba kynthup ïa ka Khasi Hills Autonomous District Council, ka Jaiñtia Hills Autonomous District Council, bad ka Garo Hills Autonomous District Council kiba hap hapoh ka jylla Meghalaya.
Kumta la ong ba ka jingai ïa ka Scheduled Tribe certificate da ka Office jong ka Deputy Commissioner ka pyni shai ba ki briew kiba la kha ha Jaiñtia Hills ki dei na ka jaitbynriew Jaiñtia (Pnar), ym na ki Khasi. Haba peit ïa ki jaitbynriew Jaiñtia wat la ki ïasam katto katne ki jingïadei bad ki Khasi, kum ka kyrteng, ka riti ka dustur, ka kolshor bad ka jingngeit ba kyrpang.
Kumta ka JSU ka kyntu ïa ki paidbah jaitbynriew Jaiñtia ba ki dei ban long kawei ha kum kane ka por ban ïeng skhem ha kawei ka nongrim ban nym ailad da leilei ruh ïa ka ban phiah ne ban weng ne ban pynsnoh ïa ki jaitbynriew Jaiñtia sha kiwei pat, bad ban pynskhem ïa ka hok long trai hangne hapoh ka jylla Meghalaya.