Shillong, Naitung, 19:Ka Joint Action Committee Border of Meghalaya (JACBOM) ha ka sngi Baar ka la mih shakhmat ban pynrem jur halor ka jingshah shoh pynmynsaw u Co-Chairman jong kane ka kynhun u Bah Charlie J. Rani uba long ruh ha kajuh ka por u President jong ka United Hynñiewtrep Movement (UHM).
U Bah Charlie Rani u la shah tangon pynmynsaw ha ka kynhun ki runar bym lah ithuh durkhmat kiba don kumba 30 haduh 40 ngut eiei ha ingsah jong u ha Pata, Mawlai Mawdatbaki ha ka 15tarik mynta u bnai ha ka por 10:30 baje eiei mynstep.
“Ngi pynrem jur ïa ka jingshoh pynmynsaw ka kynhun ki runar kiba don kumba 30 haduh 40 ngut ïa u Bah Charlie Rani, u President ka UHM bad u Co-Chairman jong ka JACBOM ha ka 15 tarik mynta u bnai hakhmat ka ingsah jong u ha Pata,Mawlai Mawdatbaki, Shillong. Kane ka la jia ha ka por kumba 10.30 baje mynstep ïa kaba la sakhi da kiba bun bad kynthup ruh ki pyrsa jong u kiba dang rit,” ong ka JACBOM ha u kyrwoh ba la phah da u Chairman u Bah Erwin K. Sutnga bad u Secretary u Bah Rastingwell Thabah.
“Ka long ka jingjia kaba shyrkhei haba ki briew ki shim ïa ka aiñ ha ki kti ban shoh pynmynsaw bad ban pyntieng pynsmiej wat ïa ki bahaing hasem jong u (Bah Charlie Rani) bad ïa ki nongïaid lynti. U Bah Charlie haduh mynta u dang don hapdeng ka jingshah sumar ha hospital haduh mynta,” ong u kyrwoh na ka JACBOM.
“Ka aiñ ka dei ban shimkhia ban pynneh pynsah ïa ka shongsuk shongsaiñ khnang ban weng ïa ka jingtieng jingsmiej jong ki nongshong shnong,” bynrap u kyrwoh.
