Nongpoh, Nailur 29: Ka Hynniewtrep Youth Council, Nongpoh Circle mynta ka sngi da ka mynsiem ba sngewkhia kala leit ban jngoh bad ban pynpaw ka jingsngewlem ïaka iing ka sem jong ka Samla Nisha Nongbet kaba la shah pyniap dusmon ha u bar jylla haka 25 tarik Nailur ha Pahamsyiem.
Ka seng haka jingïalam jong u Samla Richard Diengdoh President, Mission Tron Vice President, Tonny Shylla General Secretary haka jingdonlang u Samla Hercules Suting Secretary ka HYC Ri-Bhoi kila leit ban kynduh ïaki bahaiing hasem jong ka Samla Nisha Nongbet haka shnong Iewmawlong ha kaba kum ka seng kala pynpaw ka jingsngewkhia bad kam lah ban pdiang ïa katei ka jingjia ba ka samla Khasi kan shah shim ka jingim ha u bar jylla haka rukom kaba shyrkhei bad pynpar ñiangkhriat ïa kiba bun ki paidbah.
Na ka liang u Samla Richard Diengdoh u la pynpaw ba kum ka seng ka pynrem jur ïa katei ka jingjia bad dawa naka bor jong ka aiñ ba kam dei ban pynlait suk hynrei ban set phatok shi jingim ryngkat ka jingpynsajia ïa utei u runar ba donkti ha katei ka kam khnang ba kum kitei ki jingjia kin nym jia shuh nangne shakhmat
