Pynrem ka HNLC ïa u Secretary ka ABVP ba kyrshan ban rwai ïa ka jingrwai Vande Mataram

Shillong, Iaiong 1 : Ka Seng ba la shah ñiew beain ka Hynniewtrep National Liberation Council (HNLC) ka la pynrem jur ïa u Secretary ka Akhil Bharatiya Vidyarthi Parishad (ABVP) u Bomsing Khongtir uba ai ka jingkyrshan ban pynrwai beit ïa ka jingrwai Vande Mataram ha Meghalaya da kaba kynnoh ba kane ka pynpaw ïa ka jingbym don shuh ka jingsngew da la ki jong hi ki briew.
Ha ka kyrwoh ba la pyllait da u General Secretary ka HNLC u bah Sainkupar Nongtraw ka la kynthoh jur ïa ka ABVP kaba pdiang ïa ka jingpynshai ka ïing bishar Supreme Court ba ka jingrwai ïa ka Vande Mataram ha ki jaka paidbah kam da dei eh kaba hap ban leh beit hynrei ka dei tang ka jingai mynsiem. Ka ïing bishar ka la pynpaw ruh ba ym don kano kano ka jingshah pynshitom lada ym rwai ruh. Ka HNLC ka ong ba kane ka jingbthah ka dei sa kawei pat ka jingthombor da ka sorkar India ïa ki bym dei Hindu bad ïa ki jaidbynriew bym dei ki India kum ki Hynniewtrep.
Ka HNLC ka pynpaw ruh ba ka jingrwai Vande Mataram kam dei kaba ïeng pdeng. Ka dei ka jingrwai niam kaba ïaroh ïa ki blei ki Hindu kaba long pyrshah ïa ka jingngeit, ïa ka jingithuh bad ka histori jong ki paid Hynniewtrep namar kiba bun ki dei ki Khristan ne kiba ngeit ha ka Niam Tynrai lajong.
Ka HNLC ka ïeng ha ka nongrim ba ki paid Hynniewtrep ki khlem jied ban long ki nong India hynrei tang na ka daw ka kam. Kumta kano kano ka jingpynbor ban pyntreikam ïa kino kino ki Symbol jongka India la ka long ha kano kano ka dur ruh yn ïeng beit ban ialeh pyrshah.
Ka HNLC ka kynthoh jur ruh ïa ka jingsngap jar ka ABVP halor ki jingpynpaw pyrshah ki jylla ba bun ki paid Khristan bad kumjuh ruh na ki rit paid halor kane ka jingrwai.
Kumta ka seng HNLC ka khot bad ïawer ïa ki paid ka bri u Hynniewtrep ban long kiba peitngor ban ïada ïa kino kino ki jingthmu hiar thma ïa ka kolshor bad ka nongrim tynrai jong u Hynniewtrep.
Ka ong “ Ngi dei ban ri kyndong ïa ka jingngeit, jinglaitluid,jingithuh khlem kino kino ki jingtieng jingsmiej. Ym don jingrwai, ym don symbol ym don bor kiba na bar kiba lah ban wan mushlia bad pynbor ïa ngi namar ngin ïeng ban pynithuh sha kiwei ngi dei kiei” pynkut ka kyrwoh na ka seng HNLC