Pynrem ka HANM ba shah pynïap u Dilseng, dawa ban wanrah ki aiñ ba khlaiñ ha ka jylla

Shillong, K’ Lyngkot 15: Ka Hynñiewtrep A.chik National Movement (HANM) Garo Hills Region ka pynrem jur ïa ka jingpynïap bad thang ïa u dkhot ka ACHIK NGO, uba la khlad noh u Dilseng M Sangma ha ka 9 tarik u Kyllalyngkot ba la leit ha ka jaka ba la tip kum ka Goalgaon da ki briew na Bangladesh bad ka seng ka kyrpad jur ïa ka Tnad Pulit ka Garo Hills Region ba kan pynlong ka jingtohkit kaba stet ïa kito kiba donkti bad ban pynshitom ïa ki katkum ka aiñ.
Haba kren bad ki lad pathai khubor ha ka sngi Palei u President u Bah Lamphrang Kharbani bad u nongaiktien ka seng u John Sangma ki la kyrpad jur ruh ïa ka Sorkar Pdeng bad ka Sorkar Jylla ba kan pyntreikam ïa ka Inner Line Permit (ILP) bad ïa ka MRSSA ha ka Jylla Meghalaya ban khanglad ïa ka jingwan rung bad shong shnong be-aiñ jong ki mynder ri, kaba ki la dep ban ai ïa ki Memorandum ha u Snem 2019 ha u Myntri Ka Tnad Kam Ïing ha New Delhi ban pyntreikam ïa ka ILP bad ha u snem 2025 ruh ki la leit biang sha New Delhi ban ïakynduh bad kyrpad ïa ki nongïalam ka Sorkar Pdeng. Hynrei, haduh mynta ruh, namar ba ym pat pyntreikam ïa ka ILP, la kyrpad jur ïa ka Sorkar Pdeng bad ka Sorkar Jylla ba kan pyntreikam kloi ïa ka ILP khnang ba baroh ki briew kiba shong ha ka Ri kin ïoh shong suk bad shngaiñ bad ka seng ka dawa ruh ïa ka sorkar jylla ban thaw ïa ki aiñ kiba khlaiñ ha ka jylla.
Na ka liang ka seng ka la kyrpad ia ka sorkar jylla ba ka dei ban wanrah ki aiñ kiba khlaiñ bha khnang ban tehlakam, ban pyrkhing ïa ka jingwan ki mynder ri bad ba kan long ka jingshngaiñ ïa ki jaitbynriew kiba don ha ka jylla kiba dang long kiba rit paid.