Shillong, Jylliew, 15: Ka Federation of Khasi Jaiñtia and Garo Peoples (FKJGP) Riwar Mihngi Circle ka la pynrem jur halor ka jingjia aksiden ha surokbah Shilong-Dawki kaba la jia ha ka janmiet Sngi Baar harum Langkyrdem.
Kane ka jingjia ka dei na ka daw ba ka trok kit maw kaba la pynher sted bha ka la ïatakhuh bad ka kali Maruti Alto haba u nongniah jong ka kali Maruti Alto u la khladnoh.
“Ka seng ka pynrem jur ïa kane ka jingjia, kaba la ju jia manla ka por ha kaba ki kali kitmaw kim ju burom ïa kiwei pat ki kali kiba ïaid ba ieng kiba la shu pynher sted katba mon,” ong u kyrwoh ba la phah da u Information Secretary ka Seng u Bah Evanfield Khonglam.
Lyngba une u kyrwoh, la pyntip ba ka seng ka ju ïoh ujor na ki paitbah namarba ki kali kitmaw wat hapdeng ka jingdum lyoh ka bneng ki pyrher sted ïa ki kali khlem da thang ïa ki lait kali ha kaba bun na kine ki kali kitmaw kiba ïaid ha surok ki long ki bym biang bad ki bym tikna shuh namar bun kiba sniew hapdeng surok, bun kiba sniew taiar hapdeng surok.
Ka Seng ka la ïakynduh bad ujor ha SDO Pynursla Civil Sub-division ban shimkhia na ka bynta ban pynbeit ïa kane ka jingeh jong ki paidbah ka thaiñ Riwar.
Ka Seng ka kyntu ruh ïa ki Association jong ki trai kali bad ki nongniah kali bad kumjuh ïa ki bor Pulit ba kin shimkhia lang na ka bynta ka jingbit jingbiang jong ki paitbah.
