Shillong, Jylliew 26 : Ka Thma U Rangli Juki ka pynrem jur halor ka jingshah shoh jong ki ar ngut ki samla pule kiba na ka skul bah Central University Kerela kaba la jia ha ki thaiñ Lad Robert Hospital ha Jaïaw, Shillong ha ka 24 Jylliew 2022 bad kiwei dei kiba la jia ha kine ki khyndiat bnai ba la lah.
Katkum ka kyrwoh na ka TUR, la ong ba ka jingshah shoh khlem daw bad khlem nongrim jong ki briew kiba na shabar ka jylla bad kiba napoh ka Jylla bad ki bym dei ki khasi, la ka long naduh ki nongbylla sngi, ki nongdie dawai sha ki Hospital, ki nongbylla kiba pynpoi tiar bad pynpoi jingbam sha ïaing ki briew, ha ki katto katne ki shnong jong ka Nongbah Shillong ka jur bha ha kine ki sngi.
“Kiba bun na kine ki jingjia ki paidbah kim tip namar ym don ba nud ïapur khana bad wat ka tnat pulit ruh ka shu sngap jar jar bad kam shym kitkhia ban buddien, ban tohkit, ban kem bad pynshitom ïa ki riew runar kiba donkti ha kum kine ki kam pyntriem briew bad kiba pynbud nam ïa ki shnong ki thaw, ïa ka imlang sahlang bad ïa ka Jylla,” ong ka kyrwoh ba la phah da ka TUR.
Na ka liang katei ka kynhun ka ong ruh kum ka Jaitbynriew kaba rit paid bad kum ka Jaitbynriew bad ka Jylla kaba rit paid ki don shibun ki jingeh kiba dei ban ïakhun pyrshah la ka long naduh ka jingkyrduh kam ki samla, ka jinghiar ne jingduna ka rep ka riang, ka khaïi pateng, ka ïoh ka kot, ka jingjot ki khlaw, ki um ki wah haduh ki jingpang bad jingduna ha ka sumar pang bad kumta ter ter.
“Ho-oid, ka don ruh ka jingsheptieng ba ka Jylla bad ki Jaitbynriew ritpaid (Hynïiewtrep bad Ackik) jong ka Jylla ki lah ban shah tyllep, ba ïoh duh ka kheiñ kur kheiñ kha, ka ktien bad ka khyndew. Hynrei kine ki jingeh ne jingma kim lah pat ban pynksan nia ne mutdur ba man la uwei pa uwei ne kawei pa kawei kiba na bar Jylla bad kiba napoh ka Jylla ki bym dei ki khasi, kiba wan ïuh kjat ha ki shnong ki thaw ki dei kiba wan hiar thma ïa ngi bad ba ngin shu bom shu tied kat haba lap ha lynti syngkien ïa kiba lui lui. Hynrei ki don ki aiñ kiba ma ngi hi ngi lah thaw lyngba ki nongmihkhmat ha ka ïing dorbar thaw aiñ kum ka Benami act, ka Land transfer act bad ka Sixth Schedule kiba lah ban pynbeit ïa ka rung ka mih bad ban ïada ïa ngi,” bynrap shuh shuh ka kyrwoh na ka TUR.
Katei ka kynhun ka kyntu ruh ïa ki Dorbar Shnong ban shim khia halor kine ki jingjia bad khamtam eh ïa ki bor bad tnat pulit ban ym thiah thai lyngngai khnang ba kum kitei ki jingjia kin ym buh jingma kylla ïa ka imlang sahlang.
Ka ong ruh ba kum ka Jaidbyriew bad ka imlang sah lang baroh kawei ka dei ban shim khia bad dei ban wad ki lad ki lynti ban wanrah ïa ka jingshnong shngaiñ bad ruh ha kajuh ka por dei ban ïakhun na ka bynta ka ïohkam ïohjam jong ki samla bad kiwei ki jingeh kum ka jingduk, jingkyrduh bad jinglah shilliang ha ka ïoh ka kot bad kumta ter ter.
