Nongpoh, Nailur 28: Ka Synjuk ki Rangbah Shnong Ri-Bhoi District kala pynrem jur ïa u riew thrang snam u ba dei ruh u bar jylla u ba la nud ban pyniap dusmon ïaka Samla Nisha Nongbet naka shnong Iew Mawlong da kaba rukom pyniap kaba sngewtriem bad sngew ngiew kaba pynpar ñiangkhriat ïa kiba bun ba lang. Haba kren sha ki lad pathai khubor mynta ka sngi u Bah BB Makdoh Chairman ka Synjuk ki Rangbah Shnong u la ong ba kum ki nongïalam Shnong kim lah satia ban pdiang ïa katei ka jingshah pyniap ka samla khasi haka rukom kaba sngewtriem kaba ot ryndang bad dung na kpoh bad ka pynrem jur ïa utei u bar jylla bala tip kyrteng kum u Dil Bahadur Thapa ba u dei ban ioh ka rai pynrem bad ka jingpynsajia kaba tyngeh naki bor jong ka aiñ.
Kum ka Synjuk ki Rangbah Shnong ka ai ka jingkyrshan ba pura ïa ka jingïaid paidbah bad ka jingthang mombait kum ka jingsngewlem ïaka jingshah pyniap jong ka samla Nisha Nongbet bala rai ban pynlong da ki 4 tylli ki kynhun Sengbhalang ba kynthup ïaka KSU, RBYF, FKJGP, bad HNYF haka 30 tarik mynta u bnai naduh ka por 2 baje janmiet.
U la ong ruh ba kum ki nongïalam shnong ki kyrshan pura ïa katei ka jingiaid paidbah bad kyrpad ruh ïaki paidbah naduh ki nongïalam shnong, ki longkmie, longkpa ki khun samla shynrang bad kynthei ban ïa mih ryntih ha katei ka sngi ban pynrem jur ïa katei ka jingjia, ba kum kitei ki jingjia kim dei shuh ban dang jia nangne shakhmat.
