Shillong, Lber 28: Ka Shillong Press Club ka la pynrem jur ïa ka jingkem bad ka jingkem biang sa shisien ïa u Assistant General Secretary ka Guwahati Press Club, Dilwar Hussain Mozumder ha ki pulit ka Assam.
“Ka jingkem biang ïa u mardor hadien ba la ai jamin ïa u kam dei tang kaba pynkhuslai jur hynrei ka dei ruh ka jingpyndonkam bakla ïa ka lynti ka aiñ kaba pynkyndit ïa baroh. Kine ki kam ki pyni ïa ka jingthombor beit beit ïa ka jinglait luid ki nongpathai khubor bad ka hok tynrai ban pynpaw laitluid ïa kaei kaba ki sngew. Ngi ïeng da ka jingïatylli kaba khlem artatien bad u Mozumder bad ngi dawa ban pyllait noh mardor ïa u khlem da buh kyndon,” ong u President ka SPC Bah DL Siangshai ha ka kyrwoh.
U la ong ba ha ka imlang sahlang kaba synshar paidbah, ki lad pathai khubor ki don ïa ka bynta kaba kongsan ban pynthikna ïa ka jingshai, ka jingkitkhlieh, bad ka jingtuid laitluid jong ki jingtip. Ka jingpyrshang ban pynduh ïa kane ka bynta lyngba ka jingpynbor bad jingpyntieng kam long kaba lah ban pdiang bad dei ban pyrshah jur ïa ka.
“Ngi kyntu ïa ki bor synshar ban pynneh ïa ka synshar aiñ, ban burom ïa ka jinglong laitluid jong ki kot khubor, bad ban ïada ïa ka hok bad ka burom jong ki nongpathai khubor. Kum kine ki buit pynthut ki dei ban sangeh noh lada ngi kwah ban pynneh pynsah ïa ki jinglong synshar paidbah kiba la pruid dak ha ka Riti Synshar jong ngi,” u la ong.
