Pynrem jur ka NPP ïa ki shitniam ba thombor ïa ka jingrakhe Christmas, dei ban burom kylliang

Shillong, K’Lyngkot 02: U Working President jong ka National People Party u Bah Hamletson Dohling u la pynpaw ba ka party ka pynrem jur ïa ka jingjia ba dang shen halor ka jingthombor ki shit niam ia ki Christan ha ka por ba rakhe ïa ka Christmas.
Haba ïa kren bad ki katto katne ngut ki lad pathai khubor u Bah Hamlet u la ong, “Ngi la iohi ha kiba bun ki jylla ka ri India bad ruh ha ka jylla ba marjan jong ka Assam ha Nalbari ba ki Khristan kila la shah thombor ha ka por ba rakhe ïa ka Christmas, ha ki katto katne ngut ki riew shit niam bad na ka liang ka party ngim lah ban pdiang ia kine kiei kiei baroh khoit.”
“Baroh ngi tip ba ka ri India ka burom ïa baroh ki jait niam bad kadei ban don ka jing burom ba mar kylliang hynrei kato ka jingjia ba shah thom bor ki Khristan kadei kaba ngim lah ban pdiang” ong u Bah Hamlet.
Shuh shuh u Bah Hamlet u la pynpaw ba kum ka party ki pynrem jur ïa kato ka jingleh jong ki katto katne ngut ki riew shit niam bad ngi sngew ba ka sorkar India ne ka sorkar jylla kim dei ban ai lad hynrei ki dei ban pynshitom ia ki da kaba tyngeh khnang ba kan ym jia shuh namar ba kane ka lah ban long kaba ma bha lada ym lah ban tem ha ka por ba sdang.
“Ka sorkar kadei ban peit ba baroh ki jait niam kin ioh mane laitluid bad ka jingburom mar kylliang kadei ban don bad nna ka liang jong ka NPP ka pynrem jur ia kane ka jingjia bad kum kine kim dei ban jia shuh nangne sha khmat,” ong u Bah Hamlet bad bynrap ruh “ngim lah ban pdiang ba kum kine ki jingjia kin jia hapoh ka ri India bad da kino kino ki lad ngin pyrshang ban ia kren bad kiwei de ki sorkar jylla ba kin burom mar kylliang,” u la ong.