Pynrem jur ka NPP ba shah set ka sister , ki dkhot ka Catholic Charity bad ki khynnah ha Railway Station

Shillong, Nailur 22: Ka National People’s Party (NPP) kaba synshar ïa ka Jylla, ha ka sngi Nyngkong ka la pynrem jur ïa ka jingthombor bad set beaiñ ïa kawei ka riewniam (sister) katholik bad arngut ki dkhot ka Catholic Charities Jamshedpur lem bad 19 ngut ki Khynnah ha Tatanagar Railway Station, kaba jia ha ka 21 tarik Nailur 2025.
“Kane ka jingjia ka pyni ïa ka jingshah thombor ïa ka jingngeit niam ba laitluid kaba la pynshong nongrim na ki jingkynnoh ki bym lah ban pynshisha, da kaba kam ba ka dei ka kam khaïi briew bad pynkylla niam jubor,” ong u Working President ka NPP James K Sangma ha ka kyrwoh ba la pynmih ha ka sngi Nyngkong.
Na ka liang jong u, u la ong ba ka jingshisha kumba la pynshai da u Father Birendra Tete, ka long ba ïa kine ki khynnah la khot sngewbha ba kin ïashim bynta ha ka training prokram ba arsngi halor ka mat ka koit ka khiah ki khynnah bad ka roi ka san ha ka sap, haba bynrap ba ka jingset ïa ki haduh 3 baje mynstep, wat hapdeng ka jingbym don ki sakhi ba ki leh bakla, ka pyni ïa ka jingthombor pyrshah ïa ki niam rit paid.
U la ong, “Kum ka party kaba ïeng ban ïada ïa ka hok ki rit paid, ka NPP ka pynrem ïa kum kine ki jingpynsajia namar ka niam. Ngi dawa ïa ki borkhmih ba kin bat ïa ki kyndon ka Riti Synshar ka Ri ba pynthikna ïa ka hok ban mane laitluid bad ban pynthikna ba ym dei ban don ka jingthombor ïa kino kino ki kam treimon sngewbha ba shong aiñ.”