Khliehriat, Nailar 05 : Ka Kur Sumer Pyllun Khasi, Jaiñtia ka pynpaw ka jingsngewsih hamar halor ka jingshah thombor kawei ka longkmie, ha la u jong u kurim jong ka, u bah Kmen Pohtmi ha kaba u la pom ïa ka da ka wait haduh ban da dkhut ka kti ka diang jong ka.
Ka kong Inmon Sumer ka dei kaba shong ba sah ha ka Shnong Krang Pamtadong kaba hap hapoh ka Amlarem Civil Sub-Division, West Jaiñtia Hills District, ka kur Sumer ka sngewkhia bad sngewsih jur halor ka jingshah thombor katei ka longkmie bad ka kur Sumer ka pynrem jur ruh ïa u kurim jong ka uba la thombor ïa ka bad ong ruh ba kane ka jingleh jong u ka long ba u la thmu ban shim syndon ïa ka jingim jong ka kurim jong u.
Katei ka longkmie ka la ialeh katba lah ban ïada ïalade hynrei hapdeng ka jingialeh u la ioh ban pom ïa ka na ka kti kadiang haduh ba la dkut syndon ka kti hangta hi bad mynsaw ruh ka dur khmat haduh ba ka la shitom jur bha na ka daw ka jingshah thombor.
Na ka liang ka Kur Pyllun Sumer Khasi, Jaiñtia ka kyrpad jur ïa ka bor jong ka aiñ ban shimkhia ban pynshitom katkum ka aiñ ïa une u briew thrang snam uba thmu ban shim wat ïa ka jingim jong ka kurim jong u. Ka Kur Sumer Pyllun ka la ong shuh shuh ba kim kwah shuh ban dang iohi ba kin dang wan jia nangne shakhmat kaba lah ruh ban ktah ïa ka jingshong suk shong shngaiñ ha ka imlang ka sahlang bad ha ka Kur Sumer.
Katkum ka ejhar ba la buh da ki khun jong ka kong Inmon Sumer ha Amlarem Poilce Station, pyrshah ïala u jong u kpa la ong ba u bah Kmen Pohtmi mynta la kumba katto katne bnai bunsien u ju wad daw bad pynmih ïa ka jingiakajia. Hynrei la kynnoh ba dei ha ka 02tarik mynta u bnai ba une u kurim u la leh syndon ia katei ka kam kaba shyrkhei. Na ka liang ki khun ki la dawa ruh na ki bor ka ain ba kadei ban leh da kaba tyngeh namar ka jingthmu jong u ka long beit kumba u thmu ban shim ïa ka jingim ka kurim.
