Nongstoiñ, Naitung, 17: Ka KSU Umkrem Unit ka la pynrem jur ïa ki nongwan bret ïa iwei i khunlung hapoh shnong ha ka sngi thohdieng, ha kaba la lap da uwei u nongñiah kali na thaiñ marngor ha ka por 8 baje mynmiet. Na ka liang ka seng ka pynpaw ba kine kiba wan bret ïa i khunlung ki dei kita ki bym don shuh ïa ka mynsiem briew, hynrei kiba don ïa ka mynsiem ksuid kiba la nud ban bret ïa la I khun kiba la pun hi dalade.
Kane ka jingjia ka la pynher syrngiew bad pynsuh jer ïa ka shnong bad ïa ka dong ka thaiñ hi baroh kawei, ba ka dei ruh ka jingjia kaba nyngkong hapoh shnong kan jia kum kane ka jingjia. Kumta ka seng ka la dawa ïa ki bor jong ka aiñ, ba kin thwet jur ïa ka kmie bad u kpa jong une u khunlung bad ba kin ai da ka jing pynsaja kaba tyngeh, khnang ba kum kine ki jingjia kin ym jia shuh hapoh ka bri u Hynñiewtrep.
Ka seng ka la ai khublei ruh ïa u nonglap ïa i ne i khunlung wat ha ka jingdum ka miet ruh, hynrei khlem jingsheptieng u la len lade ban leit tam ïa i ne i khunlung. Ka seng ka ai ka jingkitbok ïa ine i khunlung ba in dang ïai heh ïaisan ïai plung, da ka jingsumar ki ban sa ri ïa i.
Ka seng ka la maham jur ruh ïa ki kynthei bad shynrang, ba kim dei shuh ban ïa shong ha ki jaka ba dum bad kynjah, namar lada lap ka seng kan ai da ka jingpynshitom kaba tyngeh, pynkut ka kyrwoh ba la phah da u samla Spehsylli R Thabah Publicity Secretary KSU Umkrem Unit.
