Shillong, Ïaiong 28 : Ka Education Cell jong ka KSU ha ka sngi Palei ka la pynrem jur ïa ka sorkar jylla kaba la sngap jar halor ka Common University Entrance Test (CUET) watla ka la dep ban tip naduh u snem 2020 ha ka por ba ki pdiang ïa ka National Education Policy, 2020.
Da kaba buddien halor katei ka eksam ïakhun rung klas, na ka liang ka KSU Education Cell ha kane ka sngi ka la leit ruh ban kynduh ïa u Myntri ka tnad Pule Puthi ka jylla, Bah Lahkmen Rymbui ban ïoh jingshai shuh shuh halor katei ka phang kaba la pynkulmar ïa ki samla pule kiba kwah ban bteng ïa ka jingpule jong ki.
Na ka liang u Chairman ka Cell, Samla Raymond Kharjana haba kren bad ki lad pathai khubor hadien ba ka jingkynduh ïa u Myntri u la ong, “Nga sngew ban ïaroh ïa ka jingtrei shitom jong kane ka sorkar ha kine ki khyndiat sngi, hynrei ha kawei pat ka liang nga sngew ban pynrem namar ka sorkar Meghalaya kadei kaba nyngkong na ki jylla ha ka thaiñ shatei lam-mihngi jong ka Ri ban pdiang ïa ka National Education Policy 2020 kaba la kren shai ba kandon ka Central University Entrance Test.”
Shuh shuh u la ong ruh ba namar ba ka don khlam COVID ïa katei ka Entrance Test khlem lah satia ban pyntreikam ha u snem 2021 kumta la rah noh ïa ka eksam sha u 2022. “Sngew ban pynrem ïa ka sorkar naduh u 2020 haduh mynta mynne kumno kam kyndit bynriew ban pyrkhat ïa kaba bha tam ban pynkhreh na bynta kane ka CUET,” la bynrap biang u samla Raymond.
U la ong ruh ba mynta pat syndet syndet ki khynnah pule ka jylla ha ka 24tarik ki la ïoh ïa ka jingbthah ban hap rejistar na ka bynta katei ka test.
Halor kane, utei u nongïalam ka KSU u la pyntip ruh ba ka seng kan bteng ban ïatrei lang na ka bynta ki samla pule halor katei ka bynta bad la pynbna ruh kin sa buh ïa ka Online Coaching Class na ka bynta ki samla pule ka jylla kumno ba kin lah ban pynkhreh na ka bynta katei ka test.
Nalor ki nongïalam ka Seng ki la pynpaw ba ha ka jingïakren bad u Myntri ki la pynsngew ba lada pynïaid shakhmat ïa katei ka test, ka sorkar jylla kadei ban pyntikna ba ki khynnah pule ka jylla kim dei satia ban duh jingmyntoi lane shem jingjynjar.
