Shillong, Nailar, 31: Ki Khasi Jaiñtia Church Leaders Forum (KJCLF) ha ka sngi Balang ka la pynrem jur bad pynpaw ruh ïa ka jingsngew kyndit bad jingsngewkhia kaba khraw halor ka jingshah pynjulor ki tiar ba kyntang jong ka Iingmane Catholic ba la rim tam ha ka shnong Daram.
Ha kaba ïadei bad kane, ki Pulit jong ka Resubelpara Police Station ki la register case bad ki la pynlong ruh ïa ka jingtohkit kaba bniah khnang ban lap ïa ki runar kiba donkti ban pynjot dusmon ïa ki tiar ba kyntang jong ka ïingmane kaba la jia ha ka 24 tarik mynta u bnai.
Kum ban shu pyntip, kane ka Iingmane kaba don ha ka shnong Daram ka dei kawei na ki ïingmane ba la rim tam jong ka Balang Katholik ha rilum Garo ha kaba ki riew leh dusmon ki la rung jubor hapoh ka Iingmane bad pynpait ïa ki dur mot jong u Jisu, ka Maria bad u Joseph.
“Ka Forum ka pynrem jur ïa kine ki jingleh kiba sniew bad kiba lah ban pynkha ïa ki jingïashun ha ka imlang sahlang bad ka khot ïa ki bor synshar ban leh ïa kaba donkam pyrshah ïa kine ki nongleh kam sniew,” ong u kyrwoh ba la phah da Secretary jong ka KJCLF u Rev. EH Kharkongor,
Kane ka kynhun ki nongïalam Khristan hapoh ka shatri jong ka KJCLF ka phah ruh ïa ka khubor jingpynshngaiñ bad ka jingkyrshan lang sha ki parabangeit, ki dkhot bad ki nongïalam jong ka Balang kiba la mad ïa kane ka jingjia kaba ktah ïa ka jingngeit Niam jong ki.
