Shillong, Naiwieng, 19: Ka Hynñiewtrep Youth Council (HYC) ha ka sngi Balang ka la pynrem jur ïa ka jingñiah kali thurmur kaba la lam shaduh u pud ba ki ar ngut ki samla pule ka skulbah North-Eastern Hill University (NEHU) kin mynsaw jur ha ka miet Lah Sngi u Blei mynta ka taiew.
Ka Council ka la dawa ïa ka tnat Pulit bad na ki bor pynïaid jong ka skulbah NEHU ban shimkhia da kaba phah tohkit mardor ban lap kumno u briew uba nabar u la rung shapoh ka jaka pule katba u dang buaid bad la ki don neem kiwei pat ki riewshimet kiba donkti lang.
Ha u kyrwoh, ka HYC ka la pynpaw ka jingsngewkhia kaba jur na ka bynta ki arngut ki lanot bad ïa ki bahaïing hasem jong ki.
“Ngi sngewlem na ka bynta ki samla pule kiba la mynsaw bad ki bahaïing hasem jong ki ha kum kane ka por kaba eh haduh katta katta. Kane ka jingjia kaba sngewsih ka long ka jingpynkynmaw kaba shai bha ïa ki jingma kiba khraw kiba mih na ka jingñiah kali khlem jingkitkhlieh, khlemakor nalor ba la dih kyiad bad kiwei kiwei ki dawai pynbuaid. Ngi kitbok kitrwiang ïa ki arngut ki samla pule ba kin koit noh kham kloi bad ngi duwai ba kin ïoh ïa ka met kaba koit ba khiah na ka bynta jong bad ïa ki bahaïing hasem jong ki,” la ong u kyrwoh.
“Ngi kyntu ïa ka tnad Pulit bad ki bor pynïaid jong ka NEHU ban shimkhia mardor pyrshah ïa u nongñiah kali uba donkti bad kumjuh ruh ïa baroh kiba donkti ban pynthikna ïa ki jingshisha bad ki jinglong jingman kumno la shah ïa u briew uba nabar ban rung shapoh ka jaka pule hapoh ka jingdih buaid lane kumno bad bad mano ba u nongleh kam sniew u donkti ban ïa dih kyiad lang kaba la lam sha ka jingjia ba sngewsih. Ïa kiwei ruh ruh dei ban pynngat hapoh ki kyndon jong ka aiñ,” la bynrap u kyrwoh.
Ka HYC ka la dawa shuh shuh ba dei ban pynngat da ki kyndon ba tyngeh ïa u nongñiah kali kynthup ïa baroh ki bynta kiba ïadei bad ka jingñiah kali khlemakor kaba la lam sha ka jingmynsaw.
Ka Council ka la kyntu ruh ban pynjur ïa ka jingpahara, ban kham pyrkhing ïa ki jaka pule bad ban pyntreikam mardor ïa ki lad jingïada kum ki speed breaker, ki jaka ïaid kjat kiba shai bad ban buh shuh shuh ïa ki jingthoh ha ka jaka ba la jia bad kiwei kiwei ki jaka ba lah ban shah ktah ha kylleng ka jylla.
“Da kaba kdew na ka jingjia ba mynta, ngi kyntu ïa ka tnad Pulit bad kiwei kiwei ki bor synshar ban pynjur ïa ki jingpahara bad peitngor bha khamtam ha ki jaka pule bad ki jaka ba bun ki briew kiba ïaid kjat, ban leh tyngeh ïa ki nongñiah kali ba la dih kyiad bad kiwei kiwei ki rukom ñiah kali khlemakor,” la ong ka Seng bad bynrap, “ka jingshngaiñ jong ki khun ki kti jong ngi ka dei ka kam kaba hakhmat eh. Ka jingñiah kali khlem akor kam dei ka aksiden, ka dei ka kam runar kaba pynkha na ka jingleh bymsuidniew. Ngi dawa ban pynïoh ïa ka hok bad ban shim ïa ki sienjam ba tyngeh ban ïada na kine ki jingjia ba sngewsih.”
