Shillong, K’ Lyngkot 16: Ka Hynñiewtrep Youth Council (HYC) ha ka sngi Thohdieng ka la pynrem jur ïa ka jingpynsaphriang ïa ka khubor kaba la pynthohbria ïa ki kynthei Khasi lyngba kawei ka Application kaba la tip kum ka “Nolo”.
Lyngba ka kyrwoh na u President ka HYC u Bah Roy Kupar Synrem ula ong, “Kum kitei ki jait khubor kam dei satia tang kaba ktah matïong ïa ki kynthei hynrei kaba la pyntad dor bad kadei ruh ka jingthombor ïa ka longrynïeng, ka jinglong tynrai bad ïa ka kolshor jong ki paid Khasi”.
Ka HYC ka la dawa ba dei ban leh da kaba tyngeh mardor pyrshah ïa kito kiba donkti ha ka ban shna, pynïaid bad ban pynsaphriang ïa katei.
“Ngi kyntu ïa ki bor jong ka aiñ bad ïa ki bor khmih jong ka Cyber ban shim kam ïa kane ka mat khlem da pynslem shuh, ban ithuh ïa kiba donkti bad ruh ban sdang ban pynngat ha ki kyndon kiba tyngeh jong ka aiñ,” la ong u Bah Synrem.
Ka seng ka la dep ban pyntip ïa u SP jong ka East Khasi Hills District bad ïa u DIG, Eastern Range shaphang kane ka mat bad ka kyrpad ban shimkhia lem mardor.
U la ong, “Ngi khmih lynti ba ki bor kiba dei khmih kin leh eiei noh mardor bad ban pynthikna ba kiba donkti kidei ban shah pynshitom mardor.”
U la ong ba ka HYC ka la banjur ba ka hok ban pynsngew laitluid ym dei pat ban pyndonkam ha ka ban pynshongnia ïa ka jingshah thombor, ban pynlehraiñ ne pyrshah ïa ki kynthei, khamtam eh ïa ki paid riewlum.
U la ong, “Ka rukom leh da kumtei ïa ki kynthei Khasi ka pyni ïa ka rukom pyrkhat kaba don jingma, ïa kaba ym lah ban pdiang satia.”
