Jowai, Jylliew 24: Ka Dorbar Shnong Mukhla Nongrim ka pynrem jur ïa ki runar kiba donkam ban pynïap dusmon ïa u Waheh Joit Singh Suna uba bat ïa ka kam kum u Chutia hapoh ka Seiñ Raij Nangbah.
La ïathuh ba ïa ka met u Joit Singh Suna la lap ha ka por mynstep jong ka 23 tarik da ki paidbha ha ka jaka shwa ban poi ka jingkieng Sahpsain kaba dang hap hapoh ka shnong Nangbah bad u waheh Joit Singh Suna uba dei ruh naka shnong Mukhla Nongrim.
Ha ka 22 tarik u leit ban pyndep ïa ka ñiam thangbriew ha shnong Nangbah hynrei la suba ba u la shah pynïap ha ka por janmiet.
Na ka liang ka Dorbar Shnong Mukhla Nongrim ka pynpaw ka jingsngewsih halor kane ka jingjia ïa u Joit Singh Suna uba dei u khun jong ka shnong, u long ruh u briew uba jai jai bad u briew uba kit ba bah ïa ka kam shnong kam thaw bad ka ïing ka sem bad ki khun ki kti jong u.
Ka Dorbar Shnong Mukhla Nongrim ka kyrpad jur ïa ki bor jong ka aiñ lyngba ka tnad pulit ba kan shimkhia ïa kane ka kam ban kem mardor ïa ki runar kiba donkti ha kane ka kam pynïap briew.
Ka shnong ka ai khublei kumjuh ïa ka tnad Police bad u OC Incharge jong ka 8 Mer outpost, ïa ka Ummulong Outpost kumjuh ïa u SP West Jaiñtia Hills bad ka tnad Crime Scene Unit na Shillong kiba la wan poi sha katei ka jaka ba lap ïa ka met ïap ha sahpsain, kane ka long katkum ka kyrwoh khubor na u W/h Standbyme Sari General Secretary Dorbar Chnong Mukhla Nongrim.
