Nongpoh, Naitung 12: Ka Confederation of Ri-Bhoi People (CoRP) mynta ka sngi kala pynrem jur halor ka jingsma iwtung bad ka jingjakhlia ban pynlong jaka bret ñiut ïaka rud surok ha Byrnihat khlem don ba patiaw ban khat lane pynkhuid ïa katei ka jaboh kaba la neh mynta la bun phew snem naka jingbret pathar jong ki paidbah.
Watla kiba bun ki paidbah naduh ki bor shnong kila ud naka por shaka por halor ka jingsma iwtung bad ka jingisaitmet ban peit naka jingkylla kum kawei ka jaka bret jaboh ha lad Narbong Byrnihat kaba dei harud surok bah GS Road hynrei ym don satia ban patiaw ban pynkylla dur bad pynkhuid ïa katei ka jaboh haduh mynta mynne bad ki jaboh naduh ki plastic kila shu satah harud surok kaba wanrah ruh ka jingsniew dur bad isaitmet ban peit ha katei ka jaka naduh ki nongleit nongwan.
Ka thaiñ Byrnihat ka dei ruh kawei naki thaiñ bah eh bha ha Ri-Bhoi kaba don ruh ki nongshong shnong kiba la ïakhleh jaitbynriew bad ka daw bala pynlong ïa katei ka jaka ban long kum kawei naki jaka bret ñiut ka dei namar ba ym don satia ka jaka bret ñiut ba paka ha kaba ki paidbah kila shu pynlong jaka bret ñiut ïa katei ka rud surok bala kylla long ruh kum kawei ka marten bala mih ruh ka jingsma iwtung kaba buh jingeh ïaki paidbah ba shong ba sah ha katei ka jaka bad kumjuh ruh ki paidbah kiba leit ba wan.
La sakhi ruh ba ka jingbret pathar ïa ki jakhlia khamtam ki plastik ka la jur bha bad kaba la pynsniew dur shikatdei ïa ka jinglong jingman jong ka thaiñ Byrnihat nalor ka jingbun ki karkhana kiba pynmih ruh ki tdem bad ki lyer bih ba shyrkhei kaba la buh jingma ruh shikatdei ïaka koit ka khiah jong ki paid nongshong shnong tang namar ka jingjaboh kaba la ishyrkhei shaba palat.
Naka liang ka CoRP lyngba u Samla Roland Lyngdoh President ka Nongpoh Circle u la ong ba naka liang ka seng ka pynrem jur ïaka jingpynlong jaka bret ñiut ïa katei ka jaka bad ki bor ba dei peit ki dei ban shimkhia bad ki paidbah kim dei ban bret pathar ha katei ka jaka namar kam dei ka jaka bret ñiut kaba la pynisih shi katdei khamtam ïaki nongleit nongwan bad lada ym don ba shimkhia naka liang ka seng kan sa shim da kiwei pat ki lad ki lynti ba kham tyngeh.
