Shillong, K’ Lyngkot 20: Ka Catholic Association of Shillong Archdiocese (CASA) ka la pynpaw ïa ka jingpynrem kaba jur ha kaba ïadei bad ka jingjia shah thombor kaba la jia hapoh ka Balang Catholic Church kaba la don mynta la kumba 72 snem kaba la jia ha ka thaiñ Ambagaon jong ka Udalguri District, Assam, ha ka mied jong ka 15 tarik mynta u bnai, 2025.
Ha kaba ïadei bad kane na ka liang jong u president jong ka association u Bah VH Pala u la ong, “Kane ka jingjia ka la ktah shibun bha ïa ka jingngeit jong ngi bad kumjuh ruh ka la ktah ïa ka shongsuk shongsaiñ bad kane ka jaka mane kadei ka jaka kaba la ju pynlong ïa ki jingduwai.”
“Ngi kyntu ïa ki bor pynïaid jong ka jylla Assam ban shim kam kham kloi ha kaba ïadei bad kane ka jingjia bad kumjuh ruh ban leh eiei ha kaba ïadei bad ki briew kiba donkti ha kane ka jingjia khnang ban lah ban bud ïa ki riti dustur jong ka ri ha kaba ïadei bad ka niam,” u la bynrap.
Ha kaba ïadei bad kane na ka liang jong ka Catholic Association of Shillong Archdiocese ka la pynlong ïa ka jingduwai bad ka jingïadonlang bad ki riewngeit ha kaba ïadei bad kane ka jingjia.
Shuh shuh na ka liang ka Catholic Association of Shillong Archdiocese ka la ong ba kan ïaidonlang halor kane ka jingjia bad kumjuh ruh ban ïarap lem ha ka ban pynbna ïa ki lad jingïarap.
