Pynursla, Jymmang 03: Ka Pynursla Block Committee jong ka All India Trinamool Congress AITMC haka kyrwoh sha ki lad pathai khubor kaba la pyllait da u Joint Secretary (Communications) u Bah Dominic S.Wankhar ia kaba lah pynrem ïa ka jing leh torti da ki briew ka tnad ba dei peit ïaka kam ïalehkai ka sorkar jylla. Kum ka seng napoh ka thaiñ Ri War Mihngi Pynursla ka pynpaw ba wat lehse ki don ki khynnah naka thaiñ ba lah leit iahim bynta daka mynsiem ba shit rhem bad ka jing angnud ban wanrah ka nam jop, sngewsih bad sngew kyndit ban ïohi ia ki dur ba la saphriang haki lad social media bad haki kotkhubor.
U Bah Dominic u buh jingkylli ïa kane ka Sorkar MDA bad khamtam eh ïa u Myntri ba dei peit ïaka tnat sports hapoh kane ka Jylla, hato kum u Myntri kumno u dang nud ban ong ba ka Jylla ka dang lah ban pynlong wat ïaka National Games ha kano kano ka por katba ïa kane ka mat kaba hakhmat duh um lah ban kitkhlieh, tad haduh ba hap wan hiar hi da u Myntri Rangbah ka Jylla u Conrad K.Sangma sha ka shlem ialehkai.
Ka jingkylli ba buh une u nongialam ka AITMC ka Block Pynursla,ka long, “ Hato katno klur lah dep pyllut da kane ka tnat haka kam ban kyntiew bad ban pynjanai ka kam ialehkai haki discipline bapher bapher”? U la buh ka jingkylli ruh ïaki ophisar ka tnad sports jong ka sorkar, “ Hato katno klur lah mang lyngba ka Khelo India lyngba ka Ministry of Sports jong ka sorkar pdeng, bad hato kine ki ophisar ki lah ne em ban kdew katno lah dep ioh bad kumno lah pyntrei kam ha kaba iadei bad ka jing pyrshang ban kyntiew iaki samla haka sports”,
Shuh shuh ka party ka lah kdew ba kane ka sorkar MDA ka lah sei ïa kata ka State Sports Policy, hato kane ka rukom pynlong ka Meghalaya Games 2022 ka peit ne em ïa kum kine ki jingduna ba long ym tang hapoh ka nongbah Shillong wat ïaki distrik bapher bapher?
