Pynpoi ki khun Raij ïa ka ‘Symbood Khnong’ ha ‘Loom Soo-ïung’

Jowai, Naitung 11: Ka Shad Behdeiñkhlam ‘saw sngi lai miet’ kaba la sdang naduh mynta ka sngi Pynsiñ kala long kaba phuh ba phieng ha ryngkat ka jingrisa bad ka jingud ka Bom ka Bhuri da ka jingïashim bynta lang jong ki khun ka Seiñ Raij Jowai naduh u Dolloi, u Langdoh, u Pator, ki Waheh Wasan bad kiwei de.
La sakhi mynta ka sngi ka shad ñiam Behdieñkhlam ka la wan biang kumba long ha ki por mynshwa hadien jong ka jingwan lyngshop ka khlam Covid-19 ha kine ki ar snem ba la leit.
Ïa ka shad shad Behdeiñkhlam mynta ka sngi la sdang naduh ka por mynstep ba la don ka bam Tyngkong ha ‘Iung Langdoh’ nangta ki khun ka Seiñraij Jowai kila pynkhreh ïa ka Siang ka Pha ban pyndep da ka kmie jong ka ïing kum ka jingburom ïa kiba la khlad na sla jong kane ka pyrthei.
Katba ha ka por Janmiet ki khun ka Chilliang Raij (Khon Raij) kila leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha ‘Tre Kjat Loomsooïung’ New Hill Jowai.
Lashai ka sngi ba ar kaba dei ka ‘Mulong’ naduh ka por mynstep u Dolloi, u Langdoh bad ki Waheh Wasan ki sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka por jainmiet baroh ki Kmai Raij naduh ka Panaliar, Dulong, Lumpyrdi ïongpiah, Lumïongkjam, Tpep-Pale, Lumkyrwiang kin pynpoi ïa ki Deingkhlam ha Iawmusiang ha ryngkat jingshad jingkmen, katba ki khun ka Raij kin pynpoi ïa ka Khnong Blai ha Loo Sooïung.