Nongpoh, Ïaiong 12: U MDC ka Mawhati u Bah Charles Marngar lem bad ki nongïalam jong ka Synjuk ki Rangbah Shnong Border Area mynta ka sngi kila phah syndon da ka jingthoh sha u Deputy Commissioner ka Ri-Bhoi District ban tuklar halor ka jingshah kem jong 3 ngut ki samla khasi haki pulit Assam haka 10 tarik mynta u bnai na ka shnong Umpaklong hadien ka jingkynnoh ba ki thmu ban thang ïaka jingkieng kaba don ha Wah Umler bad ba dei ban pynkynriah noh ïaka case na Boithalangso Police Station sha ka jylla Meghalaya namar katkum ka rukom dei ki pulit jong ka Meghalaya baan tohkit ïa katei ka kam.
Naka liang u MDC bad ki nongïalam shnong kila pynpaw ruh ba u Incharge jong ka Mawlasnai Police Outpost u la synran lang ïaki pulit ka Assam ban kem ïa kitei ki samla khasi hynrei kaba sngewlynngoh ka long ba ki pulit jong ka Mawlasnai kim ioh ban tohkit bad kim ioh ban wanrah ïa kitei ki samla hynrei la rah beit da ki pulit Assam.
Ki nongïalam ka Synjuk ki Rangbah Shnong Border Area ba kynthup ïa u Bah Blik Sohtun President bad u Bah Alloysius Bina Secretary kila pynpaw ba kim kwah bad sheptieng ba kitei ki samla khasi kin ngat haka jingpynjynjar bad shah dusmon haki pulit Assam bad shah pynngat jubor haki kyndon aiñ bapher bapher kumta ki kyrpad sha ka sorkar lyngba u Deputy Commissioner ban pynkynriah noh ïa kitei ki samla sha ka jylla Meghalaya kaba dei ruh ka rukom bad ai ba ki pulit ka jylla kin tohkit bad leh ïa kaba donkam.
Namarkata naka liang u MDC bad ki nongïalam shnong kila kyrpad ruh sha ka sorkar ban wanrah noh ïa kitei ki samla sha ka jylla ban ioh ka jingtohkit kaba khuid bad kim kwah ba kitei ki samla kin sohsat ha along jong ka Assam.
