Pynphai biang ka ïingkashari ïa ka kam synshar khaddar ka shnat Hima Mawtamur sha KHADC

Shillong, Nailar 11: Ka Ïingkashari ka jylla ka Meghalaya High Court ka la pynphai biang ïa ka kam kaba ïadei bad ka synshar khadar ïa ka Shnat Hima Nongwah Mawtamur sha ka Executive Committee jong ka KHADC, da kaba bthah ïa ka Council ba kan pynmih ïa ki hukum kiba biang hapoh ar bnai.
Ka rai jong ka ïingkashari ka dei kaba pynshong nongrim halor ka jingshisha ba ïa ka hukum ban pynbeit ïa ka jingpynbeit ba leh bakla ha u snem 2015 la soi da tang da uwei u Executive Member, katba ka Rule-31 jong ka The Assam and Meghalaya Autonomous Districts (Constitution of District Councils) Rules, 1951, ka kren shai ba donkam ban soi duna eh arngut ki Executive Member ïa kano kano ka hukum jong ka Executive Committee.
La ong ba ka nongmudui, Shnat Hima Nongwah Mawtamur, ba la mihkhmat da u Sirdar, Bah Estansing Jana Nongbet, ka la tynjuh pyrshah ïa ka jingsynshar ïa ka thaiñ, kaba hap hapoh ka Sohïong Lyngdohship.
Shuh shuh la ong ba kane ka thaiñ ka dei kaba la pynhap kham hashuwa sha ka Jirang Syiemship namar ka jingpynbeit ba bakla ba la leh ha u snem 2015 hynrei hadien la pynbeit da ka nongshah mudui lyngba ka hukum ba 13 tarik Nohprah, 2024.
Ka Ïingkashari ba la khlieh da u Justice HS Thangkhiew ha ka hukum ba pynmih ha ka sngi Nyngkong (11 tarik Nailar) ka sngew ba ka hukum ka dei ka bym ïahap namar la soi ïa ka tang da uwei u Executive Member.
Ka Ïingkashari, namar kata, ka la phah biang ïa kane ka kam sha ka Executive Committee, haba bthah ba kan pynmih ïa ki hukum kiba biang hapoh ka ar bnai na ka sngi ba ïoh pdiang ïa ka hukum ka Ïingkashari.
Haba pynwai ïa ka mukotduma, ka Ïingkashari ka la bthah ruh ba dei ban pynneh ïa ka status quo haba ïadei bad ka jingsynshar ïa ka Shnat Hima Nongwah Mawtamur tad haduh ba ka Executive Committee ka pynmih ïa ki hukum ba donkam ha kaba ïadei bad kane kam.