Shillong, Risaw 02: Ki nongmihkhmat na North-Eastern Hill University (NEHU), ba la ïalam da u Vice-Chancellor u Prof. Prabha Shankar Shukla bad Prof. Sherwin May Sungoh, ki la kynduh ïa u Myntri khynnah ka sorkar pdeng uba khmih ïa ka Skill Development and Entrepreneurship, u Jayant Chaudhary hapoh ka North Eastern Skill Conclave ka ban long ha IIM-Shillong ban ïakren halor ka jingpyrshang ka university ban kyntiew ïa ki sap ki phong bad ki kam sengkam la jong ha ka North-East Region.
Ha ka jingïalang la pynleit jingmut halor ki kam ba la jop bad ki jingpyrkhat jong ka lawei ha kaba ïadei bad ka Deen Dayal Upadhyay Community College (DDUCC), Wahïajer, NEHU, ki jingnoh synniang halor ki kam pule puthi kaba ïadei bad ka National Skill Qualification Framework (NSQF). Na ka liang ka Prof. Sherwin May Sungoh ka la batai ïa u Myntri shaphang ki sobjek bad ki jingthmu jong ka DDUCC, kaba batai bad ki kam ïasoh halor ki kam ka UGC na ka bynta ban kyntiew ïa ki sap ki phong haba ïadei bad ka pule puthi ruh.
Na ka liang ka Prof. Sungoh ka la pynshai shuh shuh ba ka college ka pynleit jingmut ban kyntiew ha ki sap kiba kyrpang ha kane ka thaiñ ban ïarap ïa ki shnong ha ka ban kyntiew ïa ka ïoh ka kot dalade hi. Lyngba ki jingai jinghikai kiba la buh ka thong bad lyngba ki prokram, kum ki field visit, bad ka jingïatreilang bad ki kam karkhana, ka la college ka la lah ban jop ha kiba bun ki kam na ka bynta ki samla na ki thaiñ nongkyndong, khamtam ha Jaiñtia Hills, ban ailad ha ka ïohkam ïohjam, ka rep ka riang bad ka sengkam lajong.
Na ka liang u Vice-Chancellor u Prof. Shukla u la batai lyngkot haba ïadei bad ki kam ba ka NEHU ka la leh ban kyntiew ha ki kam sengkam lajong lyngba ka Entrepreneurship Development Centre (EDC) kaba la plie dangshen ha Shillong.
