Shillong, Ïaiong 11: U Symbud Myntri Rangbah ka Jylla Bah Prestone Tynsong, hynne ka sngi nyngkong, ula pynpaw ïa ka jingartatien ba dang lah ban shong bishar thymmai biang ïa soskular bala iasoi hapdeng ka Meghalaya bad Assam ban pynbeit ïa ki jingïakajia pud ha ki hynriew tylli ki jaka.
“Na kaei kaba nga ïohi, kam long shuh kaba suk ïa ki artylli ki Jylla ban shongbishar biang ïa ka soskular” ong u Bah Prestone haba ïakren bad ki nongthoh khubor haba jubab ïa ki jingdawa na ki kynhun bapher bapher ban shong bishar biang ïa ka Memorandum of Understanding (MoU) bala iasoi da ki arjylla ha ka 29 tarik Lber.
Hynrei u DyCM ula ong ba ka Sorkar ka long kaba kloi ban pynshai ïa kawei pa kawei ka mat halor ka soskular lada donkam bad bynrap “Ïa kum kane ka rai yn sa shim da u Myntri Rangbah ka Jylla hadien ba u wanphai sha Jylla”.
Haba kyntait ban kynthoh ïa ka jingkynnoh jong ka Voice of the People Party (VPP) ba wat ki jaka ki bym don ki jingïakajia kila leit sha Assam, u Bah Prestone ula ong “Ai ba u Bah Ardent Basaiawmoit un kren kat kaba u mon hynrei ngi la dep lum lut ïa baroh ki kot ki sla bad ngi la da shong bishar ïa baroh ki kot ki sla bad ngi sa shim ïa kane ka rai. Ai ba kin kren katba ki kwah hynrei kito ki briew ki bym tip ïa kine ki kot ki sla, nga tharai ngi kren tang ha lyer”.
“Hynrei ai ba ngan ïathuh ha phi ïa ka jingshisha. Kane ka dei tang ka lynti kaba ngin lah ban pynbeit shisyndon ïa ka jing ïa kajia pud” ula ong.
Haba pynpaw ba ka Sorkar Meghalaya bad Assam kila mad ïa kijuh ki jingshah tynjuh na ki Kynhun Liang Pyr shah halor ka soskular, u Symbud Myntri Rangbah ula ong ba ka jingpynbiang tarajur hangne hangtai ka long kaba donkam ban pynbeit ïa kane ka jingïakajia pud bala neh da ki phew snem.
