Pynpaw u bah Paul ïa ka jingriewspah ka jylla ha ki kam jngohkai
Hakhmat kiwei ki jylla bad u myntri sorkar pdeng
Shillong, Nailur 02 : U Myntri ka tnad Kamjngohkai pyrthei ka Jylla, Bah Paul Lyngdoh u la ong ba ka Meghalaya ka dei ka jylla kaba la kyrkhu da ki jaka jngohkai pyrthei kiba ithiang suda kaba la khring kat ïa kiba wan kai sha kane ka jylla khamtam eh naduh ka jingdon ki krem kynthup ïa ka krem Mawmluh kaba la ïoh ïa ka jingithuh da ka UNESCO.
Ha kajuh ka por u Bah Paul u la ïathuh ruh ba ha ka jingïakhun ban pynkylla ïa ka Jylla kum kawei na ki jaka jngohkai kaba baroh ki kwah lut ban wan, kum ka sorkar ki kynduh ruh ïa ki jingeh.
“Ha kito ki jaka ba pawnam ba ki paidbah ki tuid ban wan jngohkai ka la buh ruh ïa ka jingeh kaba khraw khamtam na ka jingduna ki lynti syngkien, ki jingtei ba donkam kum ki jaka sah bad ki jaka ba kongsan ba dei ban don haman ki jaka jngohkai pyrthei,” u la ong haba kren bad ki lad pathai khubor hadien ka jingïalang jong ki Myntri ka tnad Kamjngohkai pyrthei ka thain shatei lam mihngi ka ri bad u Myntri ka tnad Kamjngohkai ka Ri, u Gajendra Singh Shekhawat ha Shillong hymen ka sngi.
Kumta u la ong ban weng ïa kum kine ki jingeh, ka sorkar ka kwah ban pynshlur ïa ki kam jngohkai pyrthei kiba long salonsar khnang ba ki paidbah kin ym leit tang sha kawei ka jaka hynrei kin leit ha baroh kawei ka jylla da kaba plie lad ïaki jaka jngohkai kiba thymmai ha ka jylla.
U la ïathuh ruh ba ka sorkar ka dang wad ki lad ki lynti da kaba trei lang bad ki riewshimet kynthup ki shnong, ki nongkyntiew ïa ki kam jngohkai ban ieng tylli lang kawei na bynta kane ka sienjam.
U la ïathuh ruh ba ha ki snem ba la dep, ka Meghalaya ka la paw kum kawei na ki jaka jngohkai ha ka map leit jingleit jong ka India. Kumta u la ong ba ha u snem 2023 ki kam jngohkai pyrthei ha Meghalaya ka la lah ban aikam kumba 50,084 ngut ki nongshong shnong ha kaba ka jingpynlut kala kot sha ka 465 klur tyngka ha ki lai snem ba la dep. La ïathuh ruh shwa ka jingwan jong ka khlam COVID, ka kam jngohkai pyrthei ha Meghalaya ka la pyni ïa ka jingkiew kaba haduh 7.34 persen, kaba la khmih lynti ba kane ka jingkiew kan kham jur ha ki san snem ban wan.