Khliehriat naitung 2: Ka kong Santa Mary Shylla, kaba na ka shnong Byndihati, kaba dei ka khun jong u bah Thomas Nongtdu, ka la pynithuh ïalade sha baroh ki nongshongshnong jong ki shnong kiba hap hapoh ka Sutnga- Saipung Constituency bad ong ruh ba ka don ka jingthmu ban iakhun ïa ka election MLA ka ban sa long ha u snem 2023 bad lehse kan sa ïakhun na la party National People’s Party ban iakhun pyrshah ïa u MLA Shitlang uba dang dei kum u MLA ka thaiñ.
Ki khubor ba la ioh lum, ki iathuh ba lada ka kong Santa Mary kan ïakhun ha ka election 2023 kan hap ruh ban ïakhun pyrshah ïa u bah Vincent Pala ruh, uba dei u President jong ka Meghalaya Pradesh Congress Committee uba dang long kum u MP jong ka Lok Sabha, ha kaba mynta uba la rai ban iakhun ïa ka election MLA na Sutnga-Saipung Constiyuency ka ban long ha u snem 2023.
Ki paidbah jong ka Sutnga- Saipung Constituency ki la ong ba baroh shi katta ki la ioh mad ïa ki nongmihkhmat da ki rangbah (shynrang) bad mynta ka kynti kin ai noh ïa ka jingkyrshan ïa ka kong Santa Mary Shylla kaba dei ka longkmie.bad ki nongkyrshan jong ka ki la ong ba kin ialeh shitom katba lah ban pynjop donburom ïa ka kong Santa Mary Shylla ha kane ka kynti.
Ki la ong ba baroh shi katto ki snem ba la leit ba la mih nongmih khmat da ki rangbah, kam shym la don satia kano kano ka jingkylla ha ka Sutnga-Saipung Constituency, ym ju don mano mano ruh ban shim khia lem ban kyntiew ïa ka roi ka par, ka ioh ka kot ha ki shnong ki thaw bad kumba baroh ki tip ba ki shnong kiba don hapoh ka Sutnga-Saipung Constituency ki long kiba dang sahdien haduh katta katta bad ki dei ki shnong kiba ju shah iehnoh beiñ ha ki bor sorkar, naduh ki lynti syngkien, ki jaka ïew, ki jaka ai jingsumar, ki skul bad kiwei kiwei, kumta ki nongkyrshan jong ka kong Santa.M.Shylla ki kyrshan ainka jingkyrshan ïa ka da ka jingkhmih lynti ba lada ka jop kan wanrah ïa ka jingkylla dur hapoh ka k constituency baroh kawei.
