Pynpaw ka jingsngewkhia ki nongshong shnong ka Daistong ba pyrshah bym ioh rung sha jaka public hearing

Khliehriat, Nohprah 19 : Ki paidbah nongshong shnong jong ka shnong Daistong kiba pyrshah jur ïa ka public hearing jong ka company Shree Cement Ltd ki la pynpaw ka jingsngew khia namar ka jingshah khanglad ha ki briew kiba kyrshan ïa ka public hearing ha kaba ki khlem shah satia ïa ki ban rung sha ka jaka ba pynlong public hearing, ïa kane ka public hearing la pynlong ha madan Mooki Lum Pyrsit ha Daistong.
Haba kren sha ki pathai khubor, ki nongshong shnong kiba pyrshah ki la pynpaw ka jingsngewsih namar ka jingshah khanglad haduh ba kin iohlad ban rung sha ka jaka ba pynlong ia ka public hearing, u bah Peter Lamare u la ong “Ngi baroh kiba dei ki nongshong shnong na Daistong ngi ïa don 70 haduh 80 percent bad ngi la ïa mih paidbah kynthei bad shynrang ngi mut ban leit sha jaka ba pynlong public hearing bad ngi la ia poi ha kane ka lynti ban leit sha ka jaka long public hearing naduh ka por 9 baje mynstep, ngi don ka jinthmu ba ngin leit pynsngew ïa ka nongrim jong ngi halor ka jingpyrshah jong ngi ïa ka Shree Cement Ltd, hynrei haba poi ha kane ka lynti ban leit sha jaka long public hearing ngi la shah khanglad noh ha kaba kine ki bor jong ka sorkar ryngkat bad ki volunteer jong ka Shree Cement Ltd ki khlem ailad satia ïa ngi ban rung shapoh jaka long public hearing, te nga ha kane ka por nga sngewsih jur namar ngi kum ki nongshong shnong jong ka Daistong ngim iohlad ban leit pynsngew ïa ki nongrim kiba ngi donkam ban pynsgew hakhmat ki heh sorkar kiba don ha ka public hearing, nga kyrpad ïa ki bor ka aiñ ban shimkhia ïa kane namar ngi don ka hok ban kren ka freedom of speech kaba long katkum ka riti synshar ka ri India”
Kumjuh ruh na ka liang ka kong Lucu Pashaing, ka kong Kripty Sukhlain kiba dei ki nongshong shnong ka Daistong ki la ong “Ngi ngim kwah ïa ka huri hura, hynrei namar ka jingbym ïa sngewthuhjingmut ka pynlong ïa ngi kumne kaba la mih sa ka iashoh iadat hapdeng ki khun ka elaka Nongkhlieh, nga kren ïa u Doloi ba donburom jong ngi, kane baroh ka dei namar ka jingrhah spah ban sa leh beiñ ïa ngi ki khun ka elaka baroh, nga kwah ban ong ba lada phi leh ïa kaba bha ngim pyrshah hynrei phi la leh beiñ ïa ngi ki khun ka elaka, phi ieh khun swet ïa ngi bad peit ibeiñ ïa ngi bad tang na ka daw u bar jylla ka mih kane ka jingiashrut para ma ngi, hynrei pyrkhat bha une u bar jylla u wan hangne, u wan ban tuh lut ïa ka dud ka ngap na ka elaka hi baroh kawei”
“Ha ka jingshisha ngi kum ki khun ka shong Daistong ngi don hok ban leit sngap ïa ka public hearing hynrei sngewsih ba ki volunteer jong ka Shree Cement Ltd kiba la dep shah pynbam tyngka ki la ieng ha kylleng sawdong ka jaka bad khanglad ïa ngi, kumta nga kyrpad ïa ki bor kiba halor hato kane ka dei mo kata ka public hearing, lada dei ka public hearing te to ailad ïa ki khun ka elaka khamtam ki khun ka shnong Daistong ban kren ha public hearing, ngi pynrem jur ïa ka sorkar kaba la leh donbor shaba palat, nga kyrpad ruh ïa ka district council ban peit bad bishar ïa kane, nga pynrem jur ïa ka Shree Cement kaba la thom bor ïa ki paidbah haduh ba ngim iohlad ban rung sha public hearing”pynpaw kawei ka longkmie.
Ki la pynpaw ba ki khlem ioh shimbynta ha ka public hearing haduh kaba kut bad ki khlem iohlad satia ban kren halor rynsan ban pynsngew paidbah ïa ka jingsngew jing ki ha kaba iadei bad ka public hearing na ka bynta ka Shree Cement Ltd.